Eufrazia de Menezes (sorin loos), bainhira akompaña halo tradusaun lian jestuál hamutuk ho Portavós COVID-19, Rui Maria de Araujo (klaran). Imajen Tatoli/Jogerjo Guterres

DILI, 02 abríl 2020 (TATOLI)–Governu liuhosi Sentru Integradu Gestaun Krize (CIGC, sigla Portugés) deklara katak Timor-Leste mantein rejista kazu pozitivu ba surtu COVID-19 na’in-ida, ne’ebé Ministériu Saúde (MS) fó-sai iha loron 21 marsu liubá.

“Pontu ne’ebé Sentru Integradu Jestaun Krize hakarak atu subliña ba públiku katak bazeia ba dadus sira mak to’o ohin tuku 12 meudia, kazu importadu husi moras COVID-19 sei nafatin ida no seidauk iha kazu foun”, deklara Koordenadór Forsa Tarefa ligasaun COVID-19, Rui Maria de Araújo liuhosi konferénsia imprensa iha Sentru Mídia COVID-19, ne’ebé hala’o iha Sentru Konvensaun Dili (CCD, sigla Portugés), kinta ne’e.

Eis Ministru Saúde ne’e relata, dadus ne’ebé rekolla husi sistema vijilánsia epidemolojia MS ninian, hatudu katak to’o ohin tuku 12 meudia,  sura hahú husi komisaun interministeriál no komisaun téknika hahú halo preparatóriu ba responde pandemia ida-ne’e.

Nia adianta, ema ne’ebé iha kuarentena ka iha konfinamentu obrigatóriu, tuir terminolojia ne’ebé Dekretu Governu númeru 3/2020 aprova iha oin rua, maka hanesan auto-konfinamentu obrigatóriu signifika sira iha uma ne’ebé iha hamutuk na’in-125, iha Dili konfirma na’in-138 iha konfinamentu ne’ebé halo iha instalasaun ne’ebé Ministériu Saúde mak supervizona.

Enkuantu, iha munisípiu hamutuk na’in-71, iha Dili hamutuk 701, husi sira-ne’e la inklui sira ne’ebé liu ona loron 14 iha konfinamentu obrigatóriu tantu iha uma no instalasaun ne’ebé MS superviziona no sira ne’ebé kumpre ona loron 14 hamutuk 333.

“Purtantu, totál konfinamentu obrigatóriu ka kuarentena obrigatóriu ne’ebé oras ne’e daudaun iha hamutuk ema na’in-1.035 no sira hotu mai husi país ne’ebé afetadu”, nia informa.

Eis Primeiru-Ministru ne’e subliña, iha períodu hahú kedas Governu halo preparatóriu atu enfrenta pandemia ne’e to’o iha kinta meudia, iha kazu suspeitu hamutuk 35.

“Suspeitu signifika ema ne’ebé mai husi fatin ne’ebé afetadu ka ema ne’ebé iha kontakta ho kazu konfirmadu, ne’ebé hahú hatudu sintoma infesaun respiratóriu aguda hanesan isin manas, mear, kakorok moras no seluk-tan”, nia reforsa.

Nune’e, to’o ohin ema sira ne’e hamutuk na’in-35, halo analiza no ninia rezultadu sei nafatin ida maka pozitivu, ne’ebé fó-sai iha loron 21 marsu liubá no negativu iha na’in-24, ne’ebé hein rezultadu analiza hamutuk na’in-10.

“Faktu seluk ne’ebé hakarak subliña tan maka númeru ema ne’ebé halo auto-kuarentena sei aas, faktu seluk mós maka iha timoroan barak ne’ebé sei tama husi fronteira liuhusi dalan ilegál (jalan tikus), entaun aproveita oportunidade ida-ne’e, Sentru Integradu Kestaun Krize hakarak apela ba populasaun tomak liuliu ba líder komunitáriu sira ho mós polísia komunitária bainhira hetan karik informasaun husi membru komunidade ne’ebé foin filahusi país ne’ebé afetadu hanesan Indonézia no rai-seluk, tenke kontakta autoridade saúde, autoridade polisiál hodi lori bá kuarentena ne’ebé instituisaun Governu nia prepara ona”, nia dehan tan.

Tuir Doutór ne’e, kooperasaun importante tanba ita lahatene bainhira ema ne’ebé tama mai iha sintoma ka lae.

“Ita lahatene bainhira sira lori vírus ka lae. Entaun ita hotu iha seguransa di’akliu lori sira bá konfinamentu obrigatóriu, hodi nune’e iha observasaun di’ak hosi profisionál saúde sira  karik mosu sintoma presiza halo analiza”, nia akresenta.

Governu kontinua apela nafatin ba públiku atu kumpre medida ne’ebé fó-sai ona hosi Governu, hanesan distánsia sosiál, ijiene pesoál, fase liman bebeik ho bee no sabaun, no liman labele tau ba matan, inus no ibun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here