Diretór Ezekutivu Fórum Organizasaun Naun Governamentál Timor-Leste (FONGTIL), Daniel Santos do Carmo. Imajen Tatoli/Cipriano Colo

DILI, 02 abríl 2020 (TATOLI)–Forum Organizasaun Naun Govermentál Timor-Leste (FONGTIL) to’o kinta (02/04/2020) seidauk rejistu kazu violasaun direitu umanu ne’ebé komete hosi autoridade seguransa hanesan PNTL no F-FDTL hasoru sidadaun sira durante implementasaun estadu emerjénsia.

Diretór FONGTIL, Daniel dos Santos do Carmo hateten, to’o ohin, seidauk rekolla informasaun no simu keixa hosi komunidade relasaun ho violasaun direitu ema nian.

“Fiar katak bá-oin labele mosu violasaun ruma nune’e bele kontribui ba pás no hakmatek iha nasaun ne’e,” dehan nia ba TATOLI iha ninia servisu fatin, Caicoli, Diili, kinta (02/04/2020).

Hafoin Prezidente Repúblika dekreta estadu emerjénsia durante fulan ida hahú loron 28 fulan-marsu to’o loron 26 fulan-abríl, FONGTIL mós forma kedas ekipa ida hodi halo monitorizasaun ba implementasaun estadu emerjénsia hodi prevene violasaun direitu umanu.

“FONGTIL inisia ho nia rede servisu sira hodi estabelese ekipa servisu hodi apoiu prevensaun COVID-19 ne’ebé ho nia objetivu prinsipál tolu hanesan asegura implementasaun lei ne’ebé governu hasai atu labele halo violasaun direitu umanu, labele limita liberdade sidadaun sira-nian ne’ebé la permite ka la regula iha lei estadu emerjénsia no disponível informasaun ho apoiu nesesidade báziku ba komunidade vulnerável sira,” nia esplika.

Maibé, nia la esplika detallu kona-ba nia parte apoiu nesesidade báziku ba komunidade vulnerável durante implementasaun estadu emerjénsia ba prevensaun COVID-19.

Hosi rezultadu monitorizasaun ne’e, nia parte sei aprezenta ba Xefe Governu, Taur Matan Ruak ho Provedoria Direitu umanu no justisa (PDHJ-sigla portugés) inklui instituisaun seluk ne’ebé liga ho protesaun direitu umanu.

“Ami-nia ekipa ne’e, ami halo mós karta ba Primeiru-Ministru hodi fó atribuisaun hanesan lejitimidade ba ekipa ida-ne’e bainhira halo movimentu ruma hodi rekolla informasaun labele hetan intervensaun hosi ita-nia parte seguransa sira,” nia tenik tan.

Jornalista : Hortencio Sanchez

Editór     : Agapito dos Santos

HAKEREK NO HATÁN

Please enter your comment!
Please enter your name here