Estudante Timoroan ne'ebé hala'o estudu iha Indonézia kontinua tama-mai Timor-Leste liuhosi fronteira terrestre Batugade, Bobonaro, kinta (02/04/2020). Imajen/Eugénio Pereira

BATUGADE, 02 abríl 2020 (TATOLI)–Estudante timoroan na’in-52 ne’ebé hala’o estudu iha universidade sira iha Indonézia, ohin, kontinua hala’o viajen filamai Timor-Leste liuhosi Fronteira Batugade ho dalan legál, maibé estudante na’in-rua (2)  seluk liu dalan ilegál.

Notísia Relevante : UPF Kaer Estudante Timoroan 54

Ekipa Médiku Jerál COVID-19 ne’ebé destaka iha Fronteira Batugade, Bobonaro, lori ai-moruk líkidu rega ekipamentu no estudante Timoroan ne’ebé viajen tama Timor-Leste, kinta (02/04/2020). Imajen/Eugénio Pereira

Autoridade Polísia Unidade Patrullamentu Fronteira (UPF) Postu Integradu Batugade, informa katak estudante na’in-rua ne’ebé halo viajen liu dalan ilegál liuhosi Talilaran, Batugade nian, tanba problema pasaporte no KITAS mate no ekipa Polísia Unidade Patrullamentu Fronteira  (UPF) halo kedas kapturasaun ba sira-na’in rua hodi  lori ba entrega iha ekipa médiku COVID-19 hodi submete ba teste saúde.

Maioria estudante sira-ne’e deklara sira fila mai Timor-Leste  hodi evita-an hosi propagasaun pandemia Coronavirus ka COVID-19 ne’ebé ninia númeru komesa afeta makaas hosi ema ba ema iha Indonézia.

Tuir observasaun Agência Tatoli iha terrenu nota katak estudante sira-ne’e tama fronteira Batugade tenke forma liña no distánsia sosiál, hodi ekipa médiku lori ai moruk líkidu rega sira no sira-nia ekipamentu hanesan pasta no sasán seluk no haruka estudante sira-ne’e fase liman hodi kontinua uza Infrared Thermometer teste sira-nia kondisaun saúde.

Ekipa Médiku Jerál COVID-19 ne’ebé destaka iha Fronteira Batugade, Bobonaro, lori ai-moruk líkidu rega ekipamentu no estudante Timoroan ne’ebé viajen tama Timor-Leste, kinta (02/04/2020). Imajen/Eugénio Pereira

Dadus ne’ebé Agência Tatoli asesu hosi Servisu Migrasaun Postu Integradu Batugade no Komisaun COVID-19 ne’ebé destaka iha Batugade, rejista kata, estudante na’in-54 ne’e maihosi Surabaya, Jogjakarta, Bandung, Bali, Malang no Kupang, Indonézia.

Sidadaun Indonézia sira ne’ebé hela iha Timor-Leste barak mós kontinua halo viajen fila bá Indonézia liu fronteira terrestre.

Daudaun ne’e, Postu Integradu Batugade, Bobonaro ho Postu Integradu Motain, Indonézia nian mós serbisu hamutuk hodi loke liña fronteira rai rua durante oras rua, hahú tuku 10:00 too 12:00 Otl.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here