Diretór Operasaun AIFAESA.IP, Gabriel da Costa. Imajen Tatoli/Egas Cristovão

DILI, 02 abríl 2020 (TATOLI)–Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa katak durante Estadu Emerjénsia, autoridade ne’e hamutuk ho Polísia Nasionál Servisu Investigasaun Kriminál (PNSIK), halo ona apreensaun ba loja rua iha Dili laran tanba inventa folin máskara.

“Iha loron hirak liubá, ami hetan keixa husi komunidade balun ne’ebé bá hola máskara iha loja Jacinto foun no loja konstrusaun ida iha Audian. Bain-bain máskara ho folin normál ba pakote ida $5 to’o $6, maibé sira inventa folin to’o sai $19,50. Nune’e, ami koordena kedan ho PNSIK atu halo kedan intervensaun ba loja rua refere”, nia dehan ba Agência Tatoli via telefónika, kinta ne’e.

Dirijente ne’e adianta, ba kazu ne’e hato’o ona ba iha Ministériu Públiku tanba konsidera hanesan krime.

“Ami submete ona prosesu ne’e bá Ministériu Públiku tanba ne’e ami husu ba operadór ekonómiku atu labele inventa folin iha situsaun ida hanesan Estadu Emerjénsia no COVID-19. Kuandu viola maka nia sansaun sei selu multa $10.000 to’o $30.000 no ameasa tama kadeia tinan tolu”, Diretór Operasaun ne’e subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here