Ilustrasaun

DILI, 02 abríl 2020 (TATOLI)-Tuir Relatóriu hosi Ospitál Nasionál Guido Valadares (HNGV-sigla portugés) ba fulan-marsu nian rejistadu kazu dengue ba labarik no ema boot hamutuk 118 maka halo tratamentu saúde.

”Durante fulan-marsu pasiente ne’ebé mai rejistu kazu dengue iha HNGV no baixa iha sala pediátria hamutuk 87, dengue ba aldultu 31, totál 118,” informa Xefe Departamentu Banku Urjénsia no Ambulatóriu, Custodio Alves de Jesus ba jornalista sira iha HNGV, kinta (02/04/2020).

Nia dehan kada tinan pasiente ho moras dengue kontinua aumenta iha HNGV tanba ne’e presiza mós fó atensaun atu halo tratamentu no prevensaun.

”Ita agora daudaun haree liubá pandemia COVID-19 maibé ita mós tenke haree ba dengue tanba maioria dengue mak barak liu iha Ospitál Nasionál Guido Valadares tanba dengue ne’e tinan-tinan kontinua sa’e iha ita-nia rai-laran,” nia hatutan.

Atu prevene an hosi dengue, nia husu ba komunidade atu moris iha ambiente moos no saudavel.

”Dengue ne’e mosu tanba fo’er barak ita la hamoos uma ninin sira valeta, vazu aifuan la hamoos entaun susuk ne’e prodús no tolun iha ne’ebá hodi kria moras hirak-ne’e,” katak nia.

Meiu prevensaun ba moras dengue maka tenke hamoos tanke bee kada semana, hamoos balde no fatin ense bee sira seluk, labele tara roupa, taka bee nalihun sira, hamoos uma huun no seluk tan atu susuk labele tolun iha fatin hirak-ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here