Logo BCTL

DILI, 02 abríl 2020 (TATOLI)–Banku Sentrál Timor-Leste (BCTL, sigla portugés) aplika ona medida espesiál funsionamentu instituisaun finanseira no manutensaun prestasaun servisu mínimu durante períodu implementasaun Estadu Emerjénsia.

“Banku Sentrál Timór-Leste hakarak informa ba públiku katak introdús ona medida espesiál ida kona-ba funsionamentu instituisaun finanseira sira ne’ebé opera iha Timor-Leste, oinsá atu mantein prestasaun servisu mínimu durante periódu implementasaun Estadu Emerjénsia”, refere nota ne’ebé Agência Tatoli asesu, kinta ne’e.

Nota ne’e haktuir, Banku Sentrál fó ona instrusaun ba instituisaun finanseira sira, liuliu banku komersiál inklui instituisaun depozitóriu sira, kompañia seguru, operadór transfere osan sira no mós empreza Fintech sira, atu kontinua hala’o aktividade operasionál.

Medida espesiál sira inklui ona ho prazu ba implementasaun durante loron servisu 30, inklui oráriu ba atendimentu públiku ne’ebé sei hahú iha dadeer oras 9:30 no lorokraik oras 14:00.

“Banku komersiál sira sei kontinua mantein no fasilita servisu bankária ba públiku hanesan depózitu osan iha kaixa, operasaun kréditu, transferénsia bankária, no seluk-tan”, esplika nota ne’e.

BCTL garante disponibildade osan no funsionamentu mákina distribuisaun numeráriu (ATM) no kanál pagamentu eletróniku sira seluk iha territóriu nasionál.

Nune’e mós, limitasaun levantamentu diária iha ATM minímu ho montante $1,000.

“Banku Sentrál mós hakarak apela ba públiku tomak, liuliu individu sira ne’ebé atu halo levantamentu karik bele utiliza de’it ATM no evita hodi forma iha balkaun banku sira nian”, informa nota ne’e.

Nune’e mós, husu apoiu husi públiku atu informa mai númeru kontaktu sira alista iha nota iha mákina ATM ne’ebé la funsiona, atu ajuda tékniku sira husi banku ida-idak bele atende (fixa) problema ne’ebé iha.

Númeru kontaktu hirak husi BCTL ne’ebé bele atende (Help desk P24) maka hanesan, 7747-8405 / 7778-3479. BNU Timor:    7836-9808, BNCTL:  7724-2509, Banku Mandiri:    7357-4488, Banku BRI:  7355-7711.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here