Prezidente Komisaun B, Adérito Hugo da Costa. Imajen Tatoli/Egas Cristovão

DILI, 01 abríl 2020 (TATOLI)—Deputadu hosi Aliansa Maioria Parlamentár (AMP) husu governu justifika dokumentu pedidu levantamentu estraordinária ho montante millaun $250 no orsamentu antesipa montante millaun $150.

Entretantu, bankada Parlamentár Frente Revolusionária Timor-Leste Independente (FRETILIN) propoin atu hamosu konsensu molok halo aprovasaun ba dokumentu rua ne’e.

Hafoin adia prosesu diskusaun ba pedidu levantamentu estraordinária montante millaun $250, deputadu sira hosi Aliansa Maioria Parlamentár (AMP) hala’o reuniaun urjente iha sala bankada parlamentár Partidu Congresso da Reconstrução de Timorense (CNRT), iha loron-kuarta, 01 abríl 2020, lorokraik.

Deputadu AMP ne’e ho kadeira 34 ne’ebé partisipa reuniaun urjente mak hanesan deputadu sira CNRT, PD, KHUNTO, UDT, FM no PUDD.

Hafoin termina reuniaun urjente ne’e, Deputadu CNRT, Adérito Hugo da Costa hateten, dezde inisiu aprezentasaun estadu emerjénsia, proposta levantamentu estraordinária sein akompaña ho dokumentu konkretu, temi millaun $250 maibé la deskreve loloos montante hira ba hira.

“Dehan ba rekuperasaun ekonómika, justifikasaun ne’e la justifika ho dokumentu ne’ebé mak bele klaru. Rekoperasaun ekonómika ne’e ba saida-saida, tanba ne’e mak Governu mak halo pedidu entaun nia mak tenke mai aprezenta justifikasaun millaun $250 ne’e halo saida. Tanba ita labele fó de’it check mamuk ida,” dehan Adérito Hugo da Costa ba jornalista sira hafoin termina reuniaun urjente entre deputadu AMP iha sala Bankada CNRT, kuarta ne’e.

Nia dehan, enkontru ne’e urjente realiza hosi Aliansa Maioria Parlamentár ho kadera 34 katak bankada neen (6) iha laran.

Deputadu hosi AMP ne’e afirma, presiza halo separasaun ba pedidu levantamentu estraordinária no proposta adisionál atu antesipa COVID-19 inklui atividade rekoperasaun ekonómika.

“Se debate ba kalamidade ne’e laiha dalan tanba ne’e mak inisiativa lei ida tenke halo. Debate ne’e adia ne’e fó espasu atu haree kestaun legál. Se osan ida ba COVID-19 ne’e atu jere halo nusá tanba nia tenke halo despeza espesiál ba COVID-19. Ne’e tenke haree didi’ak tanba laiha rejime ida eziste iha-ne’e, iha mak rejime duodésimu,” nia dehan.

Deputadu Adérito Hugo afirma, Primeiru-Ministru hato’o ona demisaun ba Prezidente Repúblika maibé to’o agora seidauk foti desizaun, buat sira-ne’e kontribui sai problema.

Nia hatutan, Governu husu tiha ona pedidu levantamentu estraordinária ho montante millaun $250 maibé husu tan pedidu adisionál millaun $150.

“Ida-ne’e mak halo dada-tempu. Konkluzaun Governu la preparadu, Governu má-preparadu iha aprezentasaun estadu emerjénsia ne’e, la deskreve klaru. Ne’e mak kontribui prosesu naruk to’o agora ne’e,” nia tenik.

Deputadu Adérito Hugo mós fó-sai reuniaun urjénsia ne’ebé hala’o entre deputadu sira hosi Aliansa Maioria Parlamentár (AMP) ho kadeira 34 ne’e.

Tuir planu, ohin, Parlamentu Nasionál kontinua hala’o diskusaun ba pedidu levantamentu estraordinária iha faze jeneralidade no posibilidade tama kedas ba finál globál.

Notísia Relevante: PN Seidauk Hetan Solusaun Ba Pedidu Levantamentu no Orsamentu Hasoru COVID-19

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here