Prezidente Asosiasaun Jornalista Timor Leste no Timor Leste Press Union, Zevonia Vieira no Manuel Pinto. Imajen/Antonio Goncalves

DILI, 02 abril 2020 (TATOLI)—Asosiasaun Jornalista Timor Lorosa’e (AJTL) no Timor-Leste Press Union (TLPU), ohin, entrega karta petisaun ba Konsellu Imprensa (KI) tanba Konsellu Imprensa mak sai hanesan guardiaun ba liberdade imprensa no liberdade espresaun.

Portavóz AJTL-TLPU, Manuel Pinto hateten, petisaun ne’e nia konteúdu atu deklara AJTL-TLPU nia lamentasaun kona-ba Prezidente Repúblika Timor-Leste, Francisco Guterres “Lú Olo”, dekreta Estadu Emerjénsia iha Palásiu Prezidente Repúblika ne’ebé Gabinete Prezidente Repúblika nian halo fali live liuhosi mídia sosiál (facebook) enkuantu mídia profesionál seluk la hetan opurtunidade atu halo live.

“Ami organizasaun AJTL-TLPU hakarak entrega ami-nia karta petisaun ba Konsellu Imprensa atu deklara ami-nia lamentasaun kona-ba Prezidente Repúblika Timor-Leste, Francisco Guterres “Lú Olo” dekreta Estadu Emerjénsia ne’ebé fó-sai iha Palásiu Prezidente Repúblika. Iha momentu ne’ebá, jornalista sira hetan konvite hodi partisipa maibé estrañu uitoan mak Gabinete Prezidente Repúblika nian halo fali live liuhosi mídia sosiál, enkuantu mídia profisionál seluk ne’e la hetan oportunidade atu halo live. Ami haree ba intervensaun ne’ebé mídia Prezidente Repúblika nian halo ne’e, ami konsidera hanesan falta respeitu ba iha instituisaun mídia profisional sira,” dehan Portavóz AJTL-TLPU, Manuel Pinto, ba jornalista sira iha konferénsia imprensa iha Salaun KI, Quintál Boot, Dili, ohin.

Tanba ne’e, nia hatutan, AJTL-TLPU hato’o ba KI hodi bele prosesa no medida oinsá bele hetan solusaun ba protesta ne’e relasiona ho deklarasaun Estadu emerjénsia husi Prezidente Repúblika refere.

Deklarasaun Estadu Emerjénsia ne’e, Prezidente TLPU ne’e dehan, ema hotu-hotu no públiku iha direitu atu hatene detallu kona-ba informasaun Estadu Emerjénsia ne’e la’os live liuhosi rede sosiál ne’ebé ema balun de’it mak bele akompaña.

“Se halo live de’it iha facebook, nune’e ami hanoin ema ne’ebé mak la asesu ba mídia sosiál hanesan facebook labele asesu imediatamente informasaun kona-ba Estadu Emerjénsia nian,” nia haktuir.

Tuir loloos, nia dehan, alvu hosi sidadaun Timor-Leste ne’ebé mak asesu mídia barak liu mak rádiu no televizaun, entaun ema hirak-ne’e labele haree imediatamente tanba sira lahatene asesu ba facebook.

“Tanba ne’e, ami hakarak halo observasaun jerál ba deklarasaun Estadu Emerjénsia nian ba iha karta petisaun ne’e. Nune’e, iha futuru, karik situasaun hanesan ne’e labele halo jornalista sira hanesan komplementa (pelengkap) de’it,” Manuel Pinto hateten.

Nia esplika, jornalista sira mak sai pilár importante duni iha prosesu sira-ne’e, tanba jornalista sira asume knaar importante ida mak divulga informasaun ba públiku tuir konstituisaun RDTL haruka (artigu 40 no 41).

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here