Katuas uma-lisan hamulak "fanun" lulik hodi satan COVID-19. Imajen/Eugénio Pereira

BOBONARO, 01 abríl 2020 (TATOLI)-Katuas uma-lisan sira (kuku) hosi uma-lisan Calagatal, Fietas, Ilogolu-Lamanu, Bacugatal Leol-Lo ho uma-lisan Miegalak-Leopele hosi Aldeia Malilait, Malilu no Taimea ne’ebé pertense ba Suku Malialait, Postu Administrativu Bobonaro, Munisípiu Bobonaro, ohin, hala’o rituál hodi “fanun” lulik hotu hotu iha Timor-Leste atu satan povu Timor-Leste hosi pandemia Coronavirus ka COVID-19.

Notísia Relevante : Sinál iha Manu-Aten Hatudu, COVID-19 La Atake Timor-Leste

Serimónia rituál ne’ebé hahú ho tradisaun dadolin hosi uma-lisan no la’o-ain ho distánsia kilómetru-ida hosi Suku Malilat sa’e foho tutun Malilait Bobonaro ne’e, lia-na’in hamulak tuir dalan hodi husu forsa natureza atu próteze nia bei-oan Timoroan hotu hosi peste letál COVID-19.

Iha rituál ne’e, lia-na’in sira oho bibi-aman ida no manu-aman ida hodi haree nia-aten ne’ebé hatudu tuir rituál fiar nian katak, povu Timor-Leste preokupa duni ho moras ne’e, maibé iha manu-aten la hatudu sinál aat ruma atu povu Timor-Leste mate.

Lia-na’in, Moises Cang Leite,  esplika, rituál ne’e sira halo tanba fiar ba  forsa natureza ho lulik ne’ebé sira adora bele rona sira-nia lian hamulak hodi próteze nasaun no povu hosi propagasaun COVID-19.

“Ami haree iha bibi nia-ulun hosi reen-toos haree nia sinál karik hanesan odamatan moos la iha buat ida, no iha bibi nia-dikur kotuk haree mós la iha buat ida, maibé ita nia povu ta’uk-uitoan, maibé ema atu mate la iha no ita labele ta’uk Coronavirus ne’e no ita tenke fiar ita-nia forsa natureza,” Moises Cang Leite esplika.

 Nia lia tun-tan, “ami haree fali mós ba manu aten, se moras ne’e atu mai manu aten tenke toba, maibé manu aten hamriik hatudu katak, moras ne’e labele tama, maibé ita deskonfia dehan ema moras, maibé ema atu mate mós lae, ita iha Timor-Leste fiar metin nafatin  buat hotu la’o sei di’ak,” Moises hateten.

Lia na’in ne’e mós klarifika ba Governu Timor-Leste katak, Coronavoris la’ós fukun hosi Timor-Leste nian, maibé moras ne’e nu’udar rezultadu hosi ema matenek-sira mak halo hodi afeta ba ema iha mundu tomak no balun lakon vida.

Hafoin haree tiha rituál ne’e, lia-na’in husu ba xefe suku no autoridade-sira hamutuk ho povu lori osan-mutin, bua no malus hodi kasu moras no fó hahán no na’an-lulik ba natureza hodi fó forsa matak malirin hodi povu labele pániku no ta’uk.

Iha fatin hanesan, Xefe Suku Malilait, Mário de Jesus dehan, hanesan autoridade-sira kontinua fó fiar ba lia-na’in sira realiza rituál nu’udar tradisaun Timor-Leste nian.

Ekipa Ministériu Saúde, Ministériu Administrasaun Estatál no Polísia Nasionál Timor-Leste kontinua sosializa nafatin informasaun ba povu hodi izola-aan iha uma hodi kontribui prevene pandemia  COVID-19.

Serimónia rituál ne’e partisipa direita hosi autoridade suku sira, reprezentante Ofisiál Polisia Suku  no hetan partisipasaun másimu hosi populasaun.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here