Ministru Obra Públika, Salvador Eugênio Soares dos Reis Pires. Imajen/Egas Cristovão

DILI, 01 abríl 2020 (TATOLI) – Ministru Obra Públika, Salvadór Eugênio Soares dos Reis Pires, informa iha períodu Estadu Emérjénsia, Ministériu Obra Públika sei uza rendimentu Eletricidade de Timor-Leste (EDTL) hamutuk millaun $2,4 hodi fó subsídiu pre-pagu eletrisidade ho montante $15 ba kada kliente hamutuk 160.555, hafoin operadór telekomunikasaun sira kria hotline.

Desizaun MOP ne’e, ho baze ba Dekretu Governu iha ártigu 26, ba medida ezekusaun deklarasaun Estadu Emerjénsia ne’ebé públika imediatamente iha Jornál Repúblika, hafoin aprova husi Konsellu Ministru iha sábadu (28/03) atu prevene populasaun halibur malu hodi hafasil surtu Coronavírus ka COVID-19 hada’et husi ema ba ema.

“Ami diskute ho tékniku sira no sira ko’alia ona ho operadór telekomunikasaun tolu, hanesan  Telkomcel, Telemor ho Timor Telecom atu estabelese hotline ida atu fasilita kliente sira manda mensajen númeru kontadór ba hotline ne’e, hafoin automatikamente servisu ne’e manda pre-pagu eletrisidade $15 ba kliente sira ense iha uma”, tenik Ministru Salvador iha Sentru Konvesaun Dili (CCD, sigla portugés), kuarta ne’e.

Notísia Relevante: MOP Deside Fó Subsídiu Pre-pagu Eletrisidade $15 ba Kada Kliente Hamutuk 160.555

Nia dehan, pakote ne’e mós insentivu hamutuk ho proposta Ministeriu Koordenadór Asuntu Ekonómiku (MKAE), ne’ebé fó tuir Dekretu Governu nian ne’ebé aprova fó ezensaun tarifa.

“Ami prodús tiha ona token hafoin estabelese tan hotline ne’e ho ita-nia operadór telekomunikasaun tolu, hafoin ita bele anúnsia ba públiku atu fó subsídiu”, nia salienta.

Ho nune’e, nia apela ba konsumidór atu pasiénsia oituan tanba sei halo esforsu tomak atu aselera no posível atu implementa subsídiu ba konsumidór sira.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here