Médiku Jerál, Teolentino Brites. Imajen Tatoli/Osória Marques.

DILI, 1 abrÍl 2020 (TATOLI) – Médiku Jerál, Teolentino Brites, hatete entre ema na’in 26 ne’ebé daudaun ne’e hela iha kuarentene otél Luz Clarita iha ema na’in ida mak hetan sintoma Gastritis Aguda.

Nia esplika Gastritis Aguda ne’e diferensa ho sintoma Corona Virus Diseases 2019 (COVID-19) nian, tanba sintoma Gastritis Aguda ne’e lian médiku nian, maibé moras ida ne’e baibain ema dehan estómagu no dala ruma mós hirus-matan moras entaun nia halai ba kotuk laran.

“Bainhira moras ne’e akontese ona ba ita, entaun labele han tarde no labele han aimanas, hemu kafé, bee-manas no bee-malirin (bee jeladu), bebidas gás hanesan fanta, cocacola, hahán toos, no mós cokolate”, afirma nia ba TATOLI liuhusi WhatsAap (WA), ohin.

Nia hatutan bainhira moras Gastritis Aguda ne’e la afeta ba ema maka tenke halo tuir regra han nian, hahú husi dader to’o kalan. Di’ak liután labele han tarde.

Aleinde ne’e, nia informa, iha fatin kuarentena otél Luz Clarita simu ema ne’ebé mai husi nasaun infetadu sira hahú segunda semana ne’e (31/3/2020), to’o ohin loron hosi parte otél ho parte nutrisaun hosi Ministériu Saúde nian aferese hahán dobru ba pesoál saúde no ba ema sira ne’ebé hela iha kuarentene.

“Ohin, ami simu matabixu tarde uitoan. Maibé horiseik ne’e ami simu hahán dobru hosi otél na’in sira no mós hosi Ministériu Saúde nian, nune’e halo ita konfundi. Tanba ami husu para parte rua tenke halo koordenasaun hodi ita simu hahán tuir oras ne’ebé iha”, afirma tan.

Nia hatutan, antes governu booking otél ne’e pakote ho matabixu, maibé ikus mai matabixu dobru tanba dezentenmentu entre parte otél no Governu liuliu Ministériu Saúde.

“Ita-nia alin sira mós kestiona kona-ba matabixu ne’e. Tanba matabixu tarde entaun halo sira hamlaha no bele provoka ita-nia estómagu bainhira han tarde no la tuir oras han nian. Espera ba oin, sira sei iha koordenasaun ne’ebé mak di’ak hodi atende ema ne’ebé mak iha kuarentena no mós pesoál saúde sira iha ne’e”, nia hateten.

Notísia Relevante: Ema Ida iha Kuarentena Luz Clarita Hetan Sintoma Gastritis Aguda

Jornalsita : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here