Sekretáriu Estadu Komunikasaun Sosiál, Merício Juvenal dos Reis 'Akara'. Imajen Tatoli/ Egas Cristóvão

DILI, 01 abríl 2020 (TATOLI)-Governu liuhosi Sekretáriu Estadu Komunikasaun Sosiál estabelese ona sentru mídia ba jornalista sira hodi asesu informasaun kona-ba pandemia global COVID-19 ho lais no kredivel hodi transmite ba públiku.

Media Center ne’e submete iha sentru Integradu Jestaun Krize nia okos hodi fasilita informasaun ba mídia sira loron-loron kona-ba coronavirus iha Timor-Leste.

Sekretáriu Estadu Komunikasaun Sosiál (SECOMS-sigla portugés) Merício Juvinal Akara hateten Sentru ba Mídia ne’e hahú funsiona iha kuarta (01/03/2020) iha Sentru Konvensaun Dili (CCD-sigla portugés).

“Ha’u mós apresia durante ne’e tanba ita-nia media preokupa atu harii sentru media para fasilita informasaun ho loloos ida ne’e mak rezultadu ida husi jornalista sira-nia preokupasaun,”dehan Akara ba Jornalista sira iha CCD.

Governante garante ho estabelesimentu media center ne’e sei tulun jornalista sira atu publika informasaun ba públiku ho loloos no momós.

Nia husu ba jornalista sira atu komesa agora ba oin bele asesu kualker informasaun kona-ba COVID-19 liuhosi ekipa sentru mídia la’ós hosi fatin seluk.

“Sentru jestaun krize ne’e lidera husi Primeiru-Ministru no komandu ba ida ne’e no informasaun maihusi odamatan ida de’it maihusi dalan ida de’it kona-ba luta kontra COVID nian,” tenik tan.

Kompaña telekomunikasaun Telemor maka apoiu laptop ho telemovel ba ekipa jestaun krize hodi halo servisu ne’ebé iha relasaun ho informasaun.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here