Situasaun iha terrenu bainhira karreta Grand-Max mutin ida ne'ebé kondus hosi suspeitu MDC tenta soke karreta PM Taur nian. Imajen/foti hosi Facebook

DILI, 01 abríl 2020 (TATOLI) – Komandu Polísia Munisípiu Dili, ohin, detein ona suspeitu MDC ne’ebé kondús  karreta Grand-Max tenta soke karreta Primeiru-Ministru, Taur Matan Ruak nian.

Suspeitu MDC kondus karreta ne’e mak tenta soke karreta PM Taur nian. Imajen/Foti hosi Facebook

Karreta ne’ebé suspeitu kondús ho xapa matrikula A.22-180 TL ne’e tenta korta karreta PM Taur Matan Ruak nian iha area Eskola Paulo VI nia-sorin, maibé parte Korpu Seguransa Pesoál (CSP) ne’ebé fó hela eskolta ba PM Taur ho lalais korta hikas, ikus mai, karreta Grand-Max ne’e soke fali de’it karreta seguransa PM Taur nian.

Segundu Komandante Komandu Polísia Munisípiu Dili, Superintendente Euclides Belo, informa, hafoin akontesimentu ne’e, seguransa Primeiru-Ministru nian tun halo kedas atuasaun hodi kaer suspeitu no kontaktu ba Polísia Tránzitu Dili hodi halo identifikasaun ba dezastre tráfegu ne’e no halo kedas apreensaun ba karreta Grand-Max ne’e hodi lori mós suspeitu ba detein iha sela polísia para submete ba investigasaun.

“Suspeitu MDC iha hela sela polísia  hodi kumpre detensaun durante oras 72 hodi submete ba investigasaun hosi  Polísia Investigasaun Kriminál. Kinta aban (02/04/2020), maka ita foin rona rezultadu loloos,” informa Superintendente  Euclides Belo, hodi responde  ba Ajénsia Tatoli via telefónika.

Tua Sabu aqua ida rai hela iha karreta Grand-Max ne’e nia-laran. Imajen/Foti hosi Facebook

Nia hatutan, karreta PM Taur nian rasik la konsege soke, maibé PNTL konsidera asaun tenta soke Primeiru-Ministru nia karreta nu’udar krime, nune’e, sei prosesa tuir lei bazeia ba rezultadu investigasaun.

Hatán kona-ba insidente ne’e karik tanba suspeitu lanu, Superintendente Euclides dehan, prosesu investigasaun seidauk remata.

“Prosesu sei la’o hela, aban maka ita sei haree,” Superintendente Euclides Belo  tenik.

Segundu Komandante ne’e hatutan, parte polisia mós rekolla informasaun kle’an husu Korpu Seguransa Pesoál (CSP) sira ne’ebé relata ona ninia kronolojia no karreta eskolta nian ne’ebé hetan soke rezulta aat uitoan.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here