Autoridade sira implementa ho lolos dekretu Governu nian iha situasaun estadu emerjénsia, motorista sira bele tula ema, maibé tenke uza masákara. Imajen/Antonio Goncalves

DILI, 01 abríl 2020 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, kontinua apela ba sidadaun hotu atu kumpre regra estadu emerjénsia hodi prevene-aan hosi peste letál Coronavirus ka COVID-19.

Notísia Relevante : Xefe Estadu Husu PNTL ho F-FDTL Labele Viola Dekretu Governu

Komandante Jerál PNTL, Komisáriu Faustino da Costa. Imajen/Eugénio Pereira

Komisáriu Faustino da Costa, apela, atu sidadaun hotu iha konsiénsia no konsisténsia ba regra estadu emerjénsia no mós haktuir ba padraun prevensaun COVID-19 ne’ebé fó ona hosi governu ho Organizasaun Mundial Saúde (OMS).

Ba jornalista-sira iha Komandu Jerál PNTL, Caicoli, Dili, ohin, Komisáriu Faustino da Costa, esplika, knaar PNTL nian tuir dekretu governu 3/2020 kontinua sensibiliza regra estadu emerjénsia kona-ba importánsia fase-liman, uza máskara, distánsia sosiál hodi kontribui pa prevensaun  Coronavirus ka COVID-19 ne’e da’et maka’as no lalais ba ema ho ema iha mundu rai-klaran.

Relasiona ho vendedór ambulante-sira fa’an modo iha tempu lokraik iha area Merkadu Comoro, Kampu Baru, Audian no fatin-sira seluk-tan atu kumpre distánsia sosiál  no prepara sabaun ho bee-moos hodi kompradór-sira fase-liman molok kompras sasán no depois kompras sasán.

Nia hateten, serbisu PNTL oinsá sensibiliza, la’ós uza forsa no obriga tanba situasaun emerjénsia relasiona Coronavirus.

“Polísia haree atu bele kuidadu didi’ak, maibé durante implementasaun regra iha estadu emerjénsia, dezafiu boot ne’ebé polísia enfrenta mak ko’alia kona-ba transporte públiku suspende sira-nia atividade,” hateten Komisáriu Faustino da Costa.

Tuir Faustino da Costa, kona-ba transporte pasajeiru iha Timor hanesan iha kapitál Dili mak hanesan taxi, mikrolete, bis, maibé iha munisípiu-sira iha motor ojek hanesan iha Maliana, Suai, Liquiça, Manatuto maioria.

“Iha lei kódigu estrada 2003 ita seidauk iha motor ojek atu tula ema, agora ita ko’alia kona-ba transporte tula ema, entaun ojek-sira ne’e tula pasajeiru ka la’e,” Faustino da Costa hateten.

Dezafiu seluk ne’ebé iha mak, tuir Komisáriu Faustino da Costa, maske iha dekretu governu bandu ona hanesan atividade rituál, maibé atividade rituál atu satan COVID-19 iha munisípiu kontinua la’o maka’as loos.

“Iha dekretu lei númeru 3/2020 la dehan kuandu la kumpre polísia hola medida atuasaun, maibé halo de’it sensibilizasaun. Ami akompaña iha kódigu prosesu penál ida kontra ordenasaun, ida ne’e la fasil ema atu implementa,” hateten Komisáriu Faustino da Costa.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here