Parlamentu Nasional,Imajen/Antonio Goncalves

DILI, 01 abríl 2020 (TATOLI)—Parlamentu Nasionál (PN) seidauk hetan solusaun ba pedidu levantamentu estraordinária ho montante millaun $250 no orsamentu adisionál hasoru COVID-19 ho montante millaun $150.

Maski pedidu levantamentu millaun $250 hetan ona aprovasaun iha faze jeneralidade maibé Parlamentu Nasionál no Governu liuhosi Ministériu Finansa (MF) seidauk hetan entendimentu ba pedidu ne’e no proposta adisionál millaun $150.

Deputadu Bankada Parlamentár FRETILIN, Antoninho Bianco hateten, pedidu levantamentu millaun $250 maibé Governu husu tan proposta adisionál millaun $150 hamutuk millaun $400.

“Ita bele iha konsensu ida kona-ba situasaun ne’e, aprova mós regra ida kona-ba ezekusaun. Regra ezekusaun ne’e iha buat rua, ida ita uza Lei Orsamentu no Jestaun Finanseira ne’e, se hakarak altera iha prosesu normál. Ida seluk jurista sira hanoin took seráke kria fundu espesiál ba COVID-19 depois regra ezekusaun. Foti to’o millaun $400 maibé regra ezekusaun laiha entaun aplika nafatin Lei Orsamentu no Jestaun Finanseira artigu 31 ne’e,” dehan Deputadu Antoninho Bianco, liuhosi plenária estraordinária, iha Parlamentu Nasionál, kuarta ne’e.

Nia afirma, montante orsamentu ne’ebé ba COVID-19 ne’e bele foti osan boot maibé prosesu ezekusaun sei difikulta Governu tanba uza nafatin rejime duodesimál ne’ebé hakerek iha artigu 31 hosi Lei Orsamentu no Jestaun Finanseira (LOGF-sigla portugés).

Entretantu, Deputadu Bankada Parlamentár FRETILIN, Joaquim dos Santos, la konkorda pedidu levantamentu no atu aprova tan regra ezekusaun tanba durante ne’e iha ona regra ezekusaun.

“Se iha lakuna ruma iha regra ezekusaun entaun ita revoga mak lakuna ne’e para fó fleksibilidade ba ezekutivu bele halo serbisu. Ita labele tau iha lei autorizasaun ne’e regra iha tan para altera fali regra ida agora la’o hela. Ne’e tuir prinsípiu jurídiku ne’e sala ona,” Deputadu FRETILIN ne’e fó hanoin.

Tanba artigu 31 ne’e, nia hateten, só ko’alia de’it kona-ba levantamentu estraordinária.

Xefe Bankada Parlamentár PLP, Cornélio Gama “L7” hateten, agora Parlamentu autoriza Xefe Estadu deklara estadu emerjénsia no povu tomak labele movimenta maibé Parlamentu la aprova orsamentu ne’e keta lohi de’it povu karik.

“Povu bele dehan deputadu sira lohi ita karik. Osan atu hasai hira, hasai de’it tanba populasaun agora la halo natar no sira la halo sira-nia atividade loron-loron,” nia dehan.

Xefe Bankada FRETILIN, Aniceto Guterres, hateten maski diskusaun ne’e adia maibé pedidu levantamentu estraordinária millaun $250 no proposta adisionál millaun $150 tenke tau halo separasaun.

“Fundu ne’e ita atu trata Coronavirus ba longu prazu ho nia impaktu sira. Agora levantamentu ida millaun $250 ne’e urjente, sustenta mákina estadu implementa duodesimál ninian ho tan estra ba inundasaun no COVID-19. Purtantu, buat rua ne’e tenke trata ketak-ketak maibé urjente, adia mós labele tau hamutuk,” nia dehan.

Tuir nia, proposta adisionál millaun $150 ne’e atu fó resposta ba Coronavirus (COVID-19) no haree impaktu sósiu-ekonómiku bá-oin nian.

Nune’e mós Vise-Xefe Bankada Parlamentár PLP, Francisco Vasconcelos hateten, horikalan nia rona Primeiru-Ministru Portugál nian dehan ba deputadu sira halo opozisaun ba coronavirus, labele halo opozisaun ba Governu.

“Situasaun ida agora daudaun ne’e ita sei lufu-lafu hanesan ne’e, nasaun barak tama ona ba ezekusaun. Ita husu boot ba Maromak COVID-19 ne’e la akontese pozitivu ne’e labele akontese beibeik. Para ona ho ida-ne’e, ita jogu livre de’it. Maibé se aumenta tuur iha ne’e para debate, labele halai sai,” Deputadu PLP ne’e hateten.

Iha parte seluk, Deputadu Bankada CNRT, Adérito Hugo da Costa, diskorda ho deklaradaun Deputadu PLP, Francisco Vansconcelos, tanba dokumentu pedidu levantamentu no proposta adisionál ne’e iha meza no tenke halo desizaun dala-ida de’it.

“Labele autoriza tiha montante ba levantamentu ne’e, aban mak ita dehan fali sekuénsia ba ezekusaun ninian. Labele mai provoka fali dehan sé mak barani liu no sé mak la barani. Tau dokumentu rua ne’e iha meza para ita halo desizaun dala-ida, ita labele tau millaun $400 maibé lei ba ezekusaun aban fali,” dehan Deputadu Adérito Hugo da Costa.

Haree diskusaun iha faze espesialidade ne’e laiha entendimentu, Ministra Finansa Ein-ezersísiu atuál Vise-Ministra Finansa, Sara Lobo Brites, argumenta deputadu sira bele aprova tiha pedidu estraordinária ne’e maibé  problema agora hasoru mak COVID-19 ne’e.

Sara esplika, pedidu levantamentu ne’e artidu 31 (Lei Orsamentu no Jestaun Finanseira) kesi hela Governu no sei la konsege responde pedidu sira-ne’e.

Ministra Finansa Ein-ezersísiu ne’e hateten, se COVID-19 ne’e la atende lalais entaun legál sira haree took opsaun saida mak bele halo desizaun ne’ebé mak loos.

“Se ita aprova montante ne’e agora destinadu de’it ba atividade ida. Ida-ne’e mak ami haree katak parte legál sira mak bele interpreta di’ak maibé iha problema alínea 6 hosi artigu 31 ne’e. Se aprova tiha levantamentu ne’e di’ak tanba tezouru bele iha reforsu. Tanba ne’e, ha’u husu señor Prezidente parte legál sira sei tuur hamutuk lai depois sira mak fó opsaun mai ita bele iha solusaun ba ida-ne’e,” tenik Sara Lobo Brites.

Haree ba opsaun ne’ebé Ministra Finansa Ein-ezersísiu koloka, Prezidente Parlamentu Nasionál, Arão Noé de Jesus da Costa Amaral, fó hanoin katak parte legál sira hosi Governu no Parlamentu presiza tuur hamutuk hodi hili opsaun ida di’akliu.

“Se bele karik tau asesór hosi Governu ho Parlamentu Nasionál nian tuur hamutuk, sira bele hamosu solusaun ida mai ita, nune’e ita bele buka solusaun justu no giadu para solusaun ida-ne’e di’ak liu. Se deputadu sira no líder bankada sira konkorda ita fó ba sira tuur hamutuk, líder bankada sira hakarak akompaña di’ak liután, nune’e inteira kedas ona nune’e bele hetan entendimentu ida di’ak. Tanba ne’e adia ba aban, tuku 09.00,” Arão Noé hateten.

Notísia Relevante: PN Aprova Pedidu Levantamentu Iha Faze Jeneralidade

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here