Deputado iha Uma Fukun Parlamentu Nasionál. Imajen/Egas Cristovao

DILI, 01 abríl 2020 (TATOLI)—Parlamentu Nasionál (PN) aprova ona pedidu levantamentu ho montante millaun $250 hosi fundu petrolíferu no sei kontinua ba diskusaun no aprovasaun iha faze espesialidade.

Governu aprezenta proposta Lei nú 13/V/2a kona-ba autorizasaun ba realizasaun transferénsia extraordinária hosi fundu petrolíferu aprova iha jeneralidade a-favór 64 kontra O no abstensaun 0.

“Ho nune’e proposta Lei nú 13/V/2a kona-ba autorizasaun ba realizasaun transferénsia estraordinária hosi fundu petrolíferu pasa iha faze jeneralidade,” Prezidente Parlamentu Nasionál, Arão Noé de Jesus Amarál, anunsia hafoin votasaun iha plenária Parlamentu Nasionál, kuarta ne’e.

Xefe Bankada Parlamentár Partidu Demokrátiku (PD), António da Conceição ‘Kalohan’ hateten agora Timor-Leste iha hela situasaun COVID-19 entaun tenke haree hamutuk.

“Entermu jeneralidade, ita simu proposta ida-ne’e, tanba situasaun oras ne’e mak obriga ita hanoin hamutuk maibé iha debate espesialidade mak ita haree,” dehan Xefe Bankada PD ne’e liuhosi Plenária Paramentu Nasionál, kuarta ne’e.

Nia argumenta, orsamentu millaun $250 ne’e atu hametin no finánsia serbisu administrasaun públika.

Entretantu, Deputadu KHUNTO, Luís Roberto, apresia ho pedidu ne’e maibé sei rona esplikasaun klaru hosi Ministra Finansa Ein-ezersísiu.

“Ita sei halo diskusaun kle’an iha espesialidade tanba osan ne’e ba nasaun nia funsionamentu, soké osan ne’e uza ba saida de’it. Ha’u hein esplika kle’an iha debate espesialidade,” nia hatutan.

Deputadu Bankada Demokrátiku, Adriano do Nascimento hateten, oras ne’e Timor-Leste hasoru krize polítika hosi kontinua la’o ho orsamentu duodésimu.

“Ita presiza osan rezervadu ne’ebé sufisiente, karik lockdown totál iha Nova Iorke tanba ita atu transfere ita-nia osan hosi Banku Federál Amérika sei difísil. Ita mós presiza orsamentu natoon normalizasaun ba ekonomia. Nasaun ida-nee ne’e presiza ekipa konjunta nasionál ida hasoru COVID-19,” Deputadu PD ne’e fó hanoin.

Deputadu Bankada FRETILIN, Joaquim dos Santos hateten, pedidu Governu nian prenxe rekezitu hodi halo levantamentu ba fundu petrolíferu ho montante millaun $250.

“Tanba ne’e ita vota de’it ona. Ba fali espesialidade mak ita diskute,” Deputadu Joaquim dos Santos hateten.

Notísia Relevante: Assanami Propoin Ko’a Saláriu Deputadu no Membru Governu Responde Situasaun Atuál

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here