Primeiru-Ministru, Taur Matan Ruak. Imajen Tatoli/ Egas Cristovão

DILI, 01 abríl 2020 (TATOLI)Maski Estadu deklara ona Estadu Emerjénsia iha sesta (27/03), maibé tama ba loron dalimak hafoin vigora, Aeroportu Internasionál Prezidente Nicolau Lobato, Comoro, nafatin funsiona ba voo husi aviaun haat kada semana dala-ida, iha loron domingu.

Aviaun haat ne’e maka Citilink no Sriwijaya hosi Indonézia, Royal Bhutan hosi Singapura no Air North Austrália.

Primeiru-Ministru (PM), Taur Matan Ruak, informa relasiona ho voo aviaun, Governu seidauk taka totál Aeroportu Internasionál Comoro tanba timor-oan balun iha rai-li’ur sei hakarak mai Timor-Leste.

Xefe Governu adianta, Governu labele haluha nia sidadaun ne’ebé daudaun ne’e hakarak atu mai nia-rain.

“Ita hanoin katak medida hotu ne’ebé Governu toma proporsionál, progresivu ho akordu evolusaun situasaun. Tanba ne’e, ita labele haluha ita iha sidadaun sira iha li’ur no ita laiha kbiit atu ba foti sira, maibé bainhira sira ho inisiativa rasik mai ita labele duni sira”, dehan PM Taur liuhosi konferénsia imprensa iha Salaun Sentru Mídia COVID-19, iha Sentru Konvensaun Dili (CCD, sigla portugés), kuarta ne’e.

Notísia Relevante: Governu Autoriza Operasaun Aéreu Durante Estadu Emerjénsia Maibé Fó Limitasaun

Aviaun Haat Voo Mai TL Kada Semana Dala Ida

Maski daudaun Timor-Leste seidauk deside taka totál aeroportu, maibé nasaun sira seluk ne’ebé sai fatin tranzasaun atu timor-oan sira bele mai Timór taka ona.

“Ohin iha Konsellu Ministru, Ministru Negósiu Estranjeiru no Kooperasaun, Dionísio Soares Babo hateten katak infelizmente aeroportu sira iha nasaun sira hanesan Singapura, Indonézia no dalaruma iha fronteira mós deside atu taka. Ne’ebé ita la taka totál maibé sira maka taka tiha ona”, relata Xefi Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here