Primeiru-Ministru, Taur Matan Ruak. Imajen Tatoli/ Egas Cristovão

DILI, 01 abríl 2020 (TATOLI)Primeiru-Ministru (PM), Taur Matan Ruak, afirma iha ámbitu surtu globál hanesan COVID-19, Governu presiza tebes kooperasaun no kontribuisaun jornalista sira nian, liuhosi divulgasaun informasaun ne’ebé loloos no kredível ba públiku.

Xefe Governu ne’e mós husu ba mídia sira atu fó sai notísia ne’ebé labele halo pániku ba populasaun no mantein serenidade.

“Ha’u apelu ida ba jornalista sira, ita boot sira hatene iha momentu ida hanesan ne’e, ami presiza ita boot sira nia kooperasaun no kontribuisaun. Ami presiza buat ida de’it, mensajen ne’ebé mídia sira fó sai tenke ajuda atu hakalma ema no mantein serenidade”, apela PM Taur liuhosi konferénsia imprensa iha Salaun Sentru Mídia COVID-19 iha Sentru Konvensaun Dili (DDC, sigla portugés), kuarta ne’e.

Nune’e, Xefe Ezekutivu ne’e husu ba jornalista sira bainhira hakarak informasaun klaru, bele kontakta dirijente sira iha Gabinete Jestaun Krize, nune’e bele hetan informasaun klaru liután.

“Ha’u husu favór ida, hotu-hotu iha nia fatin, mantein serenidade no bainhira iha dúvida ruma Gabinete Jestaun Krize konsentradu iha Sentru Konvesaun Dili no prontu atu fó informasaun loloos no labele espekula informasaun ne’ebé ita lahatene ninia hun mai hosi fonte duvidozu”, PM Taur subliña.

Aleinde ne’e, Xefe Governu mós husu ba Instituisaun Estadu katak bainhira hakarak atu hetan esklaresementu ruma relasiona ho prevensaun ba COVID-19 bele husu ba Gabinete Jestaun Krize.

“Husu mós ba Instituisaun Estadu sira no polítiku sira, kuandu hakarak esklaresementu ruma mai husu iha Gabinete Jestaun Krize, labele halo fali espekulasaun ka halo fali polítika iha tempu ne’ebé la’ós polítika nian”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here