Primeiru-Ministru, Taur Matan Ruak. Imajen /Egas Cristovão

DILI, 01 abríl 2020 (TATOLI) – Primeiru-Ministru (PM), Taur Matan Ruak, apela ba Timor-oan sira iha kuarentena, bainhira fila ona ba uma tenke informa hikas ba médiku, bainhira sente sintoma ruma relasiona ho COVID-19.

“Ha’u atu dehan katak sidadaun sira ne’ebé kumpre ona kuarentena loron 14 bele fila bá uma, maibé kuandu deskonfia-an katak iha problema favór ida tenke kontaktu saúde no labele nonok de’it. Hanoin dehan isin manas bainbain hafoin grave tiha mak ita hakfdak”, dehan PM Taur liuhosi konferénsia imprensa iha Salaun Sentru Mídia COVID-19 iha Sentru Konvensaun Dili (DDC, sigla portugés), kuarta ne’e.

Sorin seluk, Diretóra Jéral Prestasaun Saúde, Odete Viegas, reforsa tan katak médiku sira nafatin halo akompañamentu ba sidadaun sira ne’ebé kumpre ona kuarentena durante loron 14 no fila hikas bá uma.

“Períodu tempu ba moras ne’e rasik loron 14 no kritériu ne’ebé durante ne’e kuarentena iha mós akompañamentu pesoál saúde sira no daudaun ne’e mós balun ita fó filafali ba komunidade, maibé ami mós nafatin lataka dalan hafoin loron 14 integra iha sira ninia família, ekipa médiku sira nafatin halo atendimentu ba sira bainhira hetan sintoma ruma”, Odete Viegas adianta.

Daudaun ne’e tuir dadus provizóriu husi Ministériu Saúde, Timor-oan sira ne’ebé hela iha fatin kuarentena hamutuk 18, ne’ebé estabelese ona, inklui auto-kuarentena ka hela iha uma ba ema ne’ebé husi nasaun afetadu COVID-19 hamutuk 1.231.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here