Médiku Jerál, Teolentino Brites. Imajen Tatoli/Osória Marques.

DILI, 01 abríl 2020 (TATOLI)–Médiku Jerál, Teolentino Brites hateten, pesoál saúde nia ekipamentu ne’ebé mak hodi proteje isin seidauk sufisiente ba sira tanba ne’e presiza tan ekipamentu prevensaun  espesífiku nian ba COVID-19 nian.

Nia husu ba Governu liuliu Ministeriu Saúde atu aranja ekipamentu prevensaun COVID-19 ba pesoál saúde sira ne’ebe destaka iha fatin kuarentena sira, atu nune’e bele prevene pesoál saúde hosi pandemia COVID-19 ne’e.

“Ha’u husu ba Governu liuhosi Ministériu Saúde katak aranja ekipamentu prevensaun ne’ebe di’ak ba pesoál saúde sira ne’ebe destaka ba fatin kuarentena sira, hodi bele proteje ita-nia pesoál saúde. Tanba ita hotu hatene katak nasaun barak mak COVID-19 ne’e afeta ona ba pesoál saúde sira,” dehan Médiku Jerál, Teolentino Brites, ba Agência TATOLI iha Hotel Luz Clarita, Bairru dos Grilhos, Dili, ohin.

Tanba, nia hatutan, durante nia serbisu iha fatin kuarentena Hotel Luz Clarita iha oras 24 nia-laran maibé nia mós tauk tanba laiha ekipamentu prevensaun hodi proteje ninia isin ka ninia an rasik.

“Iha-ne’e, matéria espesífika COVID-19 nian no ekipamentu prevensaun personál protesaun nian ba moras ne’e laiha. Agora daudaun iha-ne’e só máskra, alkool ho luvas de’it. Ha’u hanoin ida-ne’e seidauk bele responde ba nesesidade pesoál saúde iha kuarentena,” nia dehan.

Médiku ne’e hateten, iha kuarentena ne’e halibur ema barak tanba tauk karik iha ema sira-ne’e balun iha sintoma COVID-19 entaun susar tanba moras aat ne’e da’et lalais hosi ema ida ba ema seluk.

“Ita mós iha hotu risku nia-laran. Tanba ne’e husu atu oinsá mak ita bele fasilita malu ho ekipamentu nune’e bainhira mosu sintoma COVID-19, ita bele atende hela maluk sira ho responsabilidade,” nia informa.

Ekipamentu prevensaun ne’ebe iha-ne’e, nia tenik, agora daudaun só ida maibé la’ós katogoria ba standarizasaun internasionál nian entaun difísil uitoan.

“Ami iha-ne’e ekipamentu ida de’it. Ha’u haree ona maibé ne’e la’ós kategoria ba internasionál nian tanba difísil uitoan ba ita,”  nia hateten.

Maske menus ekipamentu prevensaun, nia hautan, nu’udar médiku no pesoál profisionál saúde nian tenke hala’o knaar ida-ne’e hodi kontribui ba nasaun Timor-Leste.

Notísia Relevante: Ema Ida iha Kuarentena Luz Clarita Hetan Sintoma Gastritis Aguda

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here