Estudante sira ne'ebé mai hosi Indonézia liu husi Fronteira Motain, bainhira to iha Hotel Katuas Dili. Imajen Tatoli/Cipriano Colo.

DILI, 01 abríl 2020 (TATOLI)–Timoroan hamutuk ema na’in 37 kompostu husi feto na’in 17 no mane na’in 20, ohin, tama mai Timor-Leste liuhosi Fronteira Terrestre, Batugade, Postu Administrativu Atabae, Munsípiu Bobonaro. 

Hosi Batugade mai Dili, timoroan hirak ne’e transporta ho bus rua ne’ebé hetan akompañamentu hosi Polísia Nasionál Timor Leste Unidade Patrulamentu Fronteira (UPF), parte ministériu Saúde, iha tuku 16:30.

Oras ne’e daudaun, Timoroan hirak ne’e, submete ona ba kuarentena iha Hotel Katuas Bairru dos Grilhos, Dili.

Diretora Nasionál Kontrolu Moras, Ministériu Saúde, Josefina Clarinha João hateten, timoroan na’in 37 ne’e tama hosi fronteira ne’ebé balun mai hosi Jakarta, Bandung, Bali, Jogjakarta no Kupaun-Indonézia.

Nia esplika, entre ema na’in 37 ne’e, iha ema na’in ida mak ho idadade 75 entaun parte Ministériu Saúde husu família sira atu lori nia ba halo auto-kuarentena iha uma. Maibé, tuir nia, família la simu no entrega hikas ba Ministériu Saúde atu tau matan.

Estudante sira ne’ebé mai hosi Indonézia liu husi Fronteira Motain, bainhira to’o ho Bus tun iha Hotel Katuas, Dili. Imajen Tatoli/Cipriano Colo.

“Sidadaun ho idade 65 ba leten labele halo kuarentena. Maibé, sidadaun ne’ebé ho idade 75 no oras ne’e iha ne’e, familia sira hanoin katak, risku boot tebes ba sira atu simu, tanba ne’e mak sira entrega fila fali ba parte Ministériu Saúde hodi tau matan. Ami nu’udár ema Saúde nian, ami tenke haree,” dehan Diretora Nasionál Kontrolu Moras, Ministériu Saúde, Josefina Clarinha João hateten ba ba Ajénsia TATOLIiha Hotel Katuas, Bairru dos Grilhos, Dili, ohin.

Nia informa, lorloron ema sei kontinua tama mai, sira ne’ebé timoroan tenke simu sira, husi estranjeiru mak estadu límita ona sira la bele mai maibé kuandu ema Timor ou kaben ho ema Timor, ne’ebé mak iha rezidénsia permanente iha ne’e, tenke simu,” nia esplika.

Kona-ba Hotel Katuas, nu’udar otél ne’ebé Governu kontrata ba fatin kuarantena foun, ho kuartu ida ema na’in rua mak hela  eseptu madre ida mak hela mesak iha kuartu ida inklui sidadaun ho idade 75 ne’e.

“Kuartu ne’e tuir kriteria tanba 3×4, ema na’in rua bele hela no bele mantein social distance,” médika ne’e dehan.

Oras ne’e daudaun, Ministériu Saúde koloka ona médiku ida, enfermeiru na’in rua hodi akompaña timoroan hirak ne’e durante loron 14.

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here