Imajen Kontribuidór/Julio Guterres.

DILI, 01 abríl 2020 (TATOLI)–Movimentu Tasi Moos (MTM), Kontinua luta Kontra COVID-19, liuhusi hamoos transporte públiku no privadu ne’ebé movimentu iha Dili laran. 

Koordenadór Movimentu Tasi Moos, Gálio Soares Araújo hateten, antes implementa Estadu Emerjénsia movimentu ne’e halo kedan limpeza no dezde loron primeiru implementasaun to’o oras ne’e, movimentu ne’e konsentra hodi hamoos iha fatin lubuk ida.

Fatin sira ne’ebe sira hamoos, nia dehan, liuliu iha fatin públiku sira hanesan edifisiu públiku hanesan sentru saúde sira iha Dili laran, Hospitál Nasionál Guido Valadares, no fatin públiku sira hanesan Palásiu governu nia oin, Largo Lecidere no seluk tan.

Imajen Kontribuidór/Julio Guterres.

“Agora daudaun ami tama fali faze ida. Hakarak hamoos transporte públiku no privadu sira. Tanba oras ne’e transporte barak sei kontinua halo movimentu maski risku ne’e agora aas. Tanba ita simu ema barak mai hosi estranjeiru no tama ona iha kuarentena. Aleinde ami ajuda rega transporte públiku no sasán-sira iha aeroportu, ami mós apoiu iha fatin sira hanesan horisehik konsentra hodi hamoos karreta iha área Lecidere nian. Ohin, ami iha área Comoro nian no mós sei ba fali parte Becora nian iha loron tuirmai,” dehan Koordenadór Movimentu Tasi Moos, Gálio Soares Araújo, ba Agéncia TATOLI iha Sentru Formasaun Polísia Comoro, Dili, ohin.

Nia dehan, asaun ne’ebé mak MTM kanaliza iha estrada públiku sira iha parte dadeer nian, tenta másima atu rega transporte públiku no privadu sira tanba tarjetu loloos sei rega iha fatin sira ne’ebé karreta sira movimentu barak liu.

Kona-ba materiál, MTM hetan apoiu husi instituisaun estadu liuliu ba lojístika maihusi Prezidénsia Repúblika mak hanesan fó apoiu bomba spriyer balun no bee hemu nian.

Ministeriu Saúde mós kanaliza ona ekipamentus balun, liuliu ekipamentu ba protesaun, Ministériu Ensinu Superiór apoiu deterjente, Clean, Byclean, no iha instituisaun balun mós fó ona sira-nia apoiu kona-ba materiál báziku hanesan Clean no Byclean.

“Emprezáriu balun mós tulun ona ami liuhosi oferese spriyer, oferese hahán, kafé, no buat seluk tan ne’ebé uza durante halo serbisu iha terrenu,” nia informa.

MTM oras ne’e ninia membru voluntáriu hamutuk na’in-30 no durante serbisu ne’e halo rotasaun,  balun tenke serbisu uluk atende servsu prinsipál sira, serbisu uma-laran nian, depois mak mai halo serbisu Kontra  COVID-19.

Notísia Relevante: MTM Kontra COVID-19 hodi Hala’o Limpeza iha Fatin Públiku

Jornalista : Cipriano Colo

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here