Diretór Jerál Água no Saneamentu, Gustavo da Cruz. Imajen/Egas Cristovão

DILI, 01 abríl 2020 (TATOLI) – Ministériu Obra Públika (MOP) liuhosi Diresaun Jerál Água no Saneamentu (GDAS, sigla portugés) deside fó subsídiu ba konsumidór bee-moos sira, hafoin Prezidente Repúblika dekreta Estadu Emerjénsia iha sesta (28/03) relasiona ho COVID-19 no Governu hahú implementa regulamentu.

Diretór Jerál Água no Saneamentu MOP, Gustavo da Cruz, hateten daudaun ne’e tékniku sira husi parte DGAS esforsu maka’as atu fó subsídiu bee-moos ba konsumidór sira Iha kapitál Dili, Liquiça, Bobonaro no Suai.

“Ha’u nia tékniku ne’ebé servisu iha terrenu, tuir polítika Governu liuhosi orientasaun Ministru Obra Públika, deklara ona katak atu fó subsídiu bee-moos ba konsumidór durante períodu Estadu Emerjénsia,” tenik Dirijente ne’e iha Sentru Konvesaun Dili (CCD, sigla portugés), kuarta ne’e.

Notísia Relevante: MOP Propoin Asesu Gratuita ba Ahi no Bee-Moos Durante Estadu Emerjénsia

Ho nune’e, Diretór Jerál ne’e dehan hahú períodu Estadu Emerjénsia, DGAS la prodús fatura hodi konsumidór sira ne’ebé atu selu tarifa.

“Iha períodu Estadu Emerjénsia ami sei la prodús fatura atu selu tarifa bee-moos husi konsumidór sira ne’ebé durante ne’e selu hela tarifa. Ami sei la uza sistema selu tarifa bee-mos,” Dirijente ne’e akresenta.

Gustavo da Cruz adianta, haree ba teknikamente bee-moos la komplikadu hanesan eletrisidade tanba ami prodús fatura hodi fó bee-moos ba konsumidór sira.

“Ami garante seirealiza durante períodu Estadu Emerjénsia iha fulan-ne’e, tanba ne’e  ami orienta ona tékniku atu fornese bee-moos no konsumidór sei la selu”, nia dehan tan.

Nia subliña, tarifa bee-moos ne’e sei válidu de’it ba kliente sira ne’ebé uza ona kontadór bee husi DGAS nian hanesan Munisípiu Liquiça,Bobonaro no Suai.

“Kuaze konsumidór bee-moos iha Dili ho totál 14.000, porsentu  4 mak selu ona tarifa”, nia salienta.

Kona-ba munisípiu sira ne’ebé komunidade uza bee-posu ida de’it, tuir Diretór Jerál ne’e iha ona orientasaun ba munisípiu sira atu halo  intervensaun  emerjénsia hodi fornese bee ba komunidade sira.

“Atu prevene COVID-19,  ha’u fó ona orientasaun ba diretór sira kada munisípiu atu apoia nesesidade ruma kuandu komunidade uza bee posu ida de’it”, nia afirma.

MOP deside fó subsídiu bee-moos ba populasaun ho baze ba Dekretu Governu 26, ba medida ezekusaun Estadu Emerjénsia ne’ebé publika ona iha Jornál da Repúblika.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here