Primeiru-Ministru, Taur Matan Ruak. Imajen Tatoli/Egas Cristovão

DILI, 01 abríl 2020 (TATOLI)Primeiru-Ministru (PM), Taur Matan Ruak, informa katak molok Governu atu halo pedidu hodi sosa ai-moruk ba moras COVID-19, maka sei husu uluk autorizasaun husi Organizasaun Mundiál Saúde (OMS).

“Iha Semana liubá, Konsellu Ministru autoriza bele sosa ai-moruk, maibé hafoin ami haree katak iha fatin-fatin iha mundu ne’e kompañia sira lohi. Entaun ha’u haruka haree filafali kompaña ne’ebé fa’an sasaán ba ita, nia tenke iha sertifikadu no ai-moruk ne’ebé ita ba sosa tenke hetan autorizasaun hosi Organizasaun Mundiál Saúde, entaun ita atraza tiha”, relata PM Taur liuhosi konferénsia imprensa iha Salaun Sentru Mídia COVID-19, iha Sentru Konvensaun Dili (DDC, sigla portugés), kuarta ne’e.

Xefi Governu adianta, osamentu ne’ebé prevee hodi sosa ai-moruk hamutuk millaun $14.

“Ita sosa liuhusi United Nations Development Programme (UNDP), nune’e bele iha serteza katak ai-moruk ne’ebé mai ne’e serifikadu, kona-ba sosa iha ne’ebé, ne’e sira mak hatene”, PM Taur akresenta.

Iha fatin hanesan, Diretóra Jéral Prestasaun Saúde, Odete Viegas, hateten esforsu tomak ne’ebé daudaun ne’e ekipa traballu interministeriál hala’o maka liuliu ba preparasaun ekipamentu, ai-moruk no rekursu, tanba ne’e Governu sei presiza asegura karik kazu sei mosu barak.

“Ein termu rekusu umanu, ita mós iha ona médiku no infermeiru ne’ebé mak daudaun ne’e halo treinamentu atu nune’e bele okupa mós espasu la’ós de’it iha Dili, maibé oinsá mós atu asegura izolamentu no kuaretena iha munisípiu tomak”, Odete Viegas realsa.

Entretantu, daudaun ne’e Governu liuhosi Ministériu Saúde kapasita ona pesoál saúde hamutuk 150 to’o 350, no tuir planu sei aumenta tan nune’e bele kobre iha munisípiu 12 inklui Rejiaun Administrativa Espesiál Oé-cusse Ambeno (RAEOA).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here