Ministra Finansa en-ezersísiu, Sara Lobo Brites. Imajen/Tatoli.

DILI, 01 abríl 2020 (TATOLI)—Governu liuhosi Ministériu Finansa (MF) rekoñese implementasaun Estadu Emerjénsia sei fó impaktu ba reseita doméstika tanba roda ekonomia ladún la’o.

Tuir ajenda ne’ebé iha, reprezentante Povu sira debate hahú hosi faze jeneralidade, espesialidade no finál globál kona-ba proposta lei númeru 13/V(2a)-autorizasaun realizasaun transferénsia extraordinária Fundu Petrolíferu ho montante millaun $250 maibé oras ne’e foin mak halo diskusaun iha faze jeneralidade.

“Ita haree katak iha fevereiru no marsu hosi reseita doméstika menus hosi estimativa ne’ebé ita halo, mai tán iha fulan-abríl ne’ebé maka ho desizaun Estadu Emerjénsia ha’u fiar katak reseita doméstika sei tún liután,” dehan Ministra Finansa Ein-Ezersísiu atuál Vise-Ministra Finansa, Sara Lobo Brites, iha ninia intervensaun iha ámbitu debate pedidu levantamentu millaun $250, iha Plenária Parlamentu Nasionál, kuarta ne’e.

Tuir nia, kálkulu ne’ebé Ministériu Finansa halo ba fulan-juñu sei iha saldu kiik no fulan-jullu sei iha saldu negativu tanba ne’e mak Governu husu pedidu millaun $250 hosi fundu minarai.

“Kuandu la iha tulun ruma atu-bele reforsa tán ita-nia kaixa estadu. Situasaun ida-ne’e iha fulan-abríl sai todan liután. Millaun $250 ne’e ami presiza tebes atu komplementa reseita hosi fundu ne’e hodi bele garante finansiamentu ba administrasaun públika hodi Hein Orsamentu Jerál Estadu vigora,” Sara Lobo Brites infroma.

Ministra Finansa Ein-Ezersísiu Atuál Vise-Ministra Finansa, Sara Lobo Brites hateten, pedidu millaun $250 atu finánsia serbisu administrasaun públika.

“Ha’u hakarak subliña hanesan ita hotu-hotu hatene hahú hosi janeiru 2020 até a data ita rekorre hela saldu tranzitadu hosi tinan 2019 nian mak hodi finánsia ita-nia despeza públika sira. Saldu hosi 2019 inklui hosi fundu kapitál umanu nomoos fundu infraestrutura,” nia dehan.

Vise-Ministra Finanasa ne’e haktuir, kada tinan finansiamentu ba iha kada Orsamentu Jerál Estadu (OJE) transferénsia hosi fundu petrolíferu opupa 80% kompara ho reseita totál, reseita doméstika apenas 10% ne’e kiik.

“Ne’e duni, kida ne’e la sufisiente finánsia atividade regulár aministrasaun públika,” nia hateten.

Vise-Ministra Finansa ne’e haktuir, saldu iha tezouru dezde janeiru mai to’o marsu kontinua hetan redusaun tanba laiha balansu entre despeza no reseita.

“Ita-nia gastu boot liu. Situasaun ida-ne’e to’o iha fulan ida nú fim iha kaixa tezouru iha pozisaun iha muito reduzidu, ne’ebé tuir tezouru nia predisaun katak fulan-juñu mai ne’e iha montante ne’ebé mak kiik tebes,” dehan.

Tuir nia, pedidu millaun $250 ne’ebé orsida sei debate, ida-ne’e tanba Timor-Leste iha situasaun duodésimu no Governu tenke husu autorizasaun ba Parlamentu Nasionál. Tanba ne’e mak nia parte husu trata hanesan urjente tanba Timor-Leste prevé ona katak to’o fulan juñu ita iha montante reduzidu no provavelmente fulan-jullu lato’o ona atu finánsia despeza públika.

Ministra Finansa Ein-Ezersísiu ne’e esplika , konta tezouru iha saldu millaun $85 maibé situasaun agora diferensa uitoan.

Debate pedidu ho karáter urjénsia ne’e partisipa hosi Sekretáriu Estadu Komunikasaun Sosiál, Mericio Juvinal Akara no ekipa tékniku sira hosi Ministériu Finansa.

Notísia Relevante:  Komisaun  C Aprova Ona Relatóriu no Pareser Ba Pedidu Levantamentu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here