Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur. Imajen/Antonio Goncalves.

DILI, 01 abríl 2020 (TATOLI)–Xefe Estadu Maior Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur preokupa ho fasilidade protesaun ba membru FALINTIL Forsa Defeza Timor Leste (F-FDTL) ho Polisia Nasionál Timor Leste (PNTL), durante halo atuasaun ba situasaun Estadu Emerjénsia.“Ida ne’e problema ba Polisia no forsa armada inklui doutór sira. Problema la iha seguransa de vida, la iha fasilidade atu proteje an. Maibé ha’u hanoin ita-nia Governu presiza tau matan ba ida-ne’e, médiku sira, PNTL no F-FDTL, no ba sira hotu ne’ebé iha situasaun hanesan ne’e hamriik iha oin,” dehan Majór Jenerál Lere Anan Timur, ba jornalista sira hafoin hala’o enkontru semanál ho Prezidente Repúblika Francisco Guterres “Lú Olo”, iha Palásiu Prezidensiál Bairru Pité, Dili, kuarta ne’e.

Jenerál ne’e hein katak, Parlamentu Nasionál bele aprova pedidu levantamentu orsamentu husi Fundu Petrolíferu atu hatán ba nesesidade emerjénsia hasoru Coronavirus (COVID-19).

“Ha’u fiar katak, ita-nia parlamentu ne’eba, deputadu sira mesak timoroan hotu, sira sei aprova no orsamentu bele pasa. Kona-ba orsamentu ita ki’ak liu ne’e, oin seluk. Maibe se ita iha osan bele foti buat hotu ne’ebé iha ona mala kidun ne’eba. Bele foti hotu atu salva morís, ida ne’e mak importante,” Lere hateten.

Entretantu, komisaun C Parlamentu Nasionál iha 31 marsu, aprova pedidu levantamentu osan hamutuk millaun $250 hosi Fundu Petrolíferu ba konta tezouru no sei utiliza mós ba prevensaun Covid-19 no udan-boot no inundasaun.

Notísia Relevante: Lere Husu Autoridade Lokál Sira Kontrola Povu Redús Movimentu

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here