DILI, 01 abríl 2020 (TATOLI)–Xefe Estadu Maior Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, husu ba autoridade lokál sira iha Timor laran tomak, liuliu iha área fronteira terrestre atu kontrola populasaun sira, redús movimentu hodi kontribui kombate surtu COVID-19.
“Fronteira terestre luan la halimar. Ita la iha kapasidade atu bele kontrola fronteira tomak, liuliu rekursu umanu menus. Labele konta de’it ita-nia PNTL ho F-FDTL iha fronteira, komunidade liuliu autoridade lokal sira mos tenke kontribui kontrola ita-nia ema sira, redús movimentu no partisipa kona-ba seguransa ida ne’e,” dehan Majór Jenerál Lere Anan Timur, hafoin hala’o enkontru semanál ho Presidente Repúblika Francisco Guterres “Lú Olo”, iha Palásiu Prezidensiál Bairru Pité, Dili, kuarta ne’e.
Lere husu ba Autoridade lokál sira atu hahú agora loro-loron tenke kontrola ninia populasaun hira mak tama no hira mak sai ne’e tenke hatene.
Antes ne’e, liuliu iha iha área fronteira terrestre, komandu F-FDTL koloka Oña pelotaun tolu iha fronteira terrestre atu reforsa seguransa, liuliu prevene movimentu illegal perante situasaun COVID-19.
Notísia Relevante: Xefe Estadu Husu PNTL ho F-FDTL Labele Viola Dekretu Governu
Jornalista : Cipriano Colo
Editór : Cancio Ximenes
