Primeiru-Ministru, Taur Matan Ruak. Imajen /Egas Cristovão

DILI, 01 abríl 2020 (TATOLI) – Governu deside estabelese ona Gabinete Jestaun Krize hodi kombate pandemia globál COVID-19, hafoin Prezidente Repúblika (PR), Francisco Guterres ‘Lú Olo’ dekreta Estadu Emerjénsia iha sesta (27/03).

Estabelesimentu Gabinete Jestaun Krize ne’e iha loron 28 marsu no lidera diretamente hosi Primeiru-Ministru (PM), Taur Matan Ruak.

Xefe Governu deklara, esforsu ne’ebé gabinete ne’e sei halo maka atu miniza mate iha Timor-Leste, haree ba referénsia iha rai barak ne’ebé surtu vírus ne’e halakon ona ema barak nia vida.

“Ami nia esforsu maka minimiza mate iha ita-nia rain, tanba ita haree esperiénsia nasaun sira seluk ema mate barak ona. Nasaun balun ema mate loron ida besik rihun, hanesan Indonézia prevee katak karik ne’e kontinua sira bele mate to’o rihun ida ka rihun ida lima nulu, Estadu Unidu Amérika prevee katak sira bele mate rihun atus ida to’o rihun atus rua. Ha’u nia pergunta ita Timór sei mate hira? Ha’u seidauk hatene no tékniku sira sei halo previzaun ba ida-ne’e, maibé ita prepara-an ba senáriu a’at. Atu minimiza mate, Governu sei halo preparasaun másimu”, dehan PM Taur liuhosi konferénsia imprensa iha Salaun Sentru Mídia COVID-19 iha Sentru Konvensaun Dili (DDC, sigla portugés), kuarta ne’e.

Notísia Relevante: Gabinete Jestaun Krize Aprezenta Métodu no Funsionamentu Luta Kontra COVID-19

Xefe Governu ne’e afirma, Gabinete Jestaun Krize prontu ona atu hala’o servisu liuliu responde ba povu nia preokupasaun relasiona ho Estadu Emerjénsia.

“Hakarak informa ba populasaun tomak katak iha ita-nia rain, hahú ohin ba oin ekipa distinadu ba kombate Coronavírus prontu ona. Ita iha semana hirak liubá iha komisaun interministeriál ne’ebé lidera husi Ministériu Saúde no ekipa téknika ida lidera hosi Diretora Odete Viegas ne’ebé halo servisu di’ak loos, mesmu iha difikuldade barak loos tuir buat ne’ebé ita bele maka atu tau-matan ba ita-nia sidadaun sira ne’ebé mai hosi rai-li’ur no ohin loron namkari oitoan-oitoan iha fatin sira ne’ebé ita bolu kuarentena”, PM adianta.

Nia observa, durante ne’e nasaun sira seluk konsidera kombate COVID-19 hanesan kombate funu ida.

“Bainhira ita kompara hanesan funu, iha funu hateten sé de’it tenke prepara-an atu fó maibé nia mós tenke prepara-an atu simu, ne’ebé senáriu piór liu maka mate”, Xefe Governu dehan tan.

Nune’e, eis Prezidente Repúblika ne’e husu ba sidadaun hotu atu koopera, nune’e bele ajuda ekipa ne’ebé servisu iha terrenu bele servisu di’ak liután.

“Karik iha família ruma mai husi li’ur labele subar, lalais kedas fó hatene tanba la fó hatene bele iha risku dahuluk ba família rasik no daruak mak foin ba komunidade sira. Tanba ne’e, hanesan Primeiru-Ministru hakarak apela ba sidadaun hotu atu koopera, tanba medida sira hotu ne’ebé Estadu toma ho objetivu ida de’it ita labele mate”, nia realsa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here