Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 01 abríl 2020 (TATOLI)–Ezekutivu sira liuhosi reuniaun Konsellu Ministru (KM), aprova Projetu Deliberasaun Governu kona-ba tetu orsamentál ba fulan-abríl 2020, iha ámbitu rejime doudesimál ho montante $114.887.000, la inklui empréstimu.

“Deliberasaun ida-ne’e prevee despeza, relasiona ho akizisaun ba ai-moruk no ekipamentu sira hodi hatán ba COVID-19, pagamentu ba pensaun, pagamentu ba arrendamentu no ba instalasaun misaun diplomata sira”, relata nota ofisiál hosi ezekutivu sira hafoin reuniaun KM, kuarta ne’e.

Nota ne’e refere liután, diploma ne’e inklui mós deliberasaun suspensaun ba despeza durante Estadu Emejénsia vigora hodi bele halo redusaun, hanesan despeza ne’ebé relasiona ho viajen lokál sira no viajen estranjeiru, organiza formasaun no semináriu no mós manutensaun ba veíkulu sira.

Antes ne’e, Governu liuhosi reuniaun KM aprova Dotasaun Orsamentu Temporáriu (DOT) ba marsu ho montante $116.449,057, ne’ebé husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór

Nune’e mós, aprova DOT ba fevereiru ho montante $116.449,057, ne’ebé totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953.

DOT ba janeiru 2020 ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Utilizasaun rejime duodesimál sura hosi prosesu aprovasaun Proposta Lei OJE 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigór.

Regra no prosedimentu aplikasaun rejime duodesimál, instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir lei orsamentál jerál Estadu númeru 13/2016.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here