Ministru Obra Públika, Salvador Eugênio Soares dos Reis Pires. Imajen/Egas Cristovão

DILI, 01 abríl 2020 (TATOLI) – Konsellu Ministru (KM) iha kuarta ne’e, aprova ona  Projetu Dekretu-Lei, atu transforma Diresaun Jerál Água no Saneamentu (DGAS, sigla portugés) ba Empreza Públika (EP) nune’e bele hasa’e prestasaun servisu no atendimentu ba konsumidór bee-moos iha Timor-Leste.

Dekretu-Lei ne’e, aprezenta husi Ministru Obra Públika, Salvador Eugênio Soares dos Reis Pires, hodi estabelese Empreza Públlika ba “Bee Timor-Leste” (BTL, E.P) no aprova Estatutu ida-idak nian.

“Empreza públika ida-ne’e, sei iha misaun ba prestasaun servisu públiku ida ba abastesimentu ka reserva ba bee no saneamentu, liuhosi investimentu iha konstrusaun, jestaun no fiskalizasaun husi sistema bee no saneamentu ba territóriu tomak no ba sirkulasaun ba bee hanesan, bele liuhosi estabelesimentu iha nível servisu uniforme iha abastesimentu bee no fornesimentu saneamentu ba populasaun”, tenik Ministru Salvador hafoin enkontru ezekutivu iha Sentru Konvesaun Dili (CCD), kuarta ne’e.

Governante ne’e dehan, Ministériu Obra Públika (MOP) aprezenta diploma tolu importante hanesan Dekretu-Lei ba transforma DGAS atu sai empreza públika hanaran “Bee Timor-Leste, Empreza Públika” (BTL,EP), Dekretu-Lei atu estabelese identidade Reguladór  Água no Saneamentu no Dekretu-Lei estabelese kritériu ba kontrolu husi kualidade ba bee hodi bele uza ba konsumu umanu.

Nia adianta, transforma DGAS sai ba “Bee Timor-Leste, Empreza Públiku (BTL,EP), ne’e MOP  hetan tulun husi Governu Portugál liuhosi empreza estatal Água Portugál hodi estabelese ezbosu lei rua ne’e.

Salvador subliña, transfromasaun ne’e DGAS ba BTL,EP, atu halo estudu hodi dezenvolve kapasidade institusionál ba setór bee hodi fornese bee ho kualidade no sustent’avel ba saúde públika no dezenvolvimentu sósiu ekonómiku.

“Objetivu protesaun saúde ba populasaun no atu prevene bee ne’ebé laiha kontaminasaun, hahú husi halibur bee ne’ebé kualidade to’o ninia distribuisaun ba konsumidór, no garante ninia abastesimentu ba bee-moos no ninia ekilíbriu ba kompozisaun,” nia akresenta.

Nia hatutan: “Ita  hatene katak  Organizasaun Saúde Mundiál (WHO, sigla inglés) katak kada investimentu $1 iha bee no saneamentu ita halo hodi bele poupansa ba gastu sira $4,3  iha saúde públika”.

Misaun ba empreza públika no indetidade reguladór água no saneamentu nian mak fundalmentál atu asegura no abastesimentu bee-moos no saneamentu liuhosi jestaun ne’ebé mak sustentável no integradu.

Nia refere liútan, objetivu atu garante kualidade bee-moos ba populasaun liuhosi estabelese  planu regula no suporta jestaun ba utilizasaun rekursu bee hanesana bee hemu, ákua-kultura no turizmu no hodi halo salva guarda ekosistema no ambiente.

Kona-ba kriasaun entidade reguladora ba bee no saneamentu, I.P. (ERAS I. P.), hanesan Institutu Públika ne’ebé ho misaun hodi propór, akompaña no asegura ezekusaun ba polítika nasionál iha domíniu husi rekursu ídriku, ho forma atu asegura ninia jestaun sustentável no integrada sira.

Ho nune’e, Ministru Salvador garante ba supervizaun no fiskalizasaun husi setór servisu abastesimentu públiku ba bee no saneamentu husi bee rezíduu urbana no resídu sólidu urbanu.

Dekretu-Lei iha ártigu 15, fó dalan ba MOP atu estabelese ba komisaun instaladora, maibé komisaun refere sei funsiona hafoin Prezidente Repúblika dekreta iha Jornál Repúblika.

Entretantu komisaun instaladóra sei prepara regulamentu hotu hodi iha janeiru tinan 2021, DGAS bele opera ona hanesan empreza estatál ho naran Bee Timor-Leste, Empreza Públika (BTL,EP).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here