Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 01 abríl 2020 (TATOLI)-Governu liuhosi reuniaun Konsellu Minstru kuarta (01/03/2020) aprova ona deliberasaun ida atu estabelese kontratu ho Programa Nasaun Unida ba Dezenvolvimentu (UNDP-sigla inglés) hodi sosa ai-moruk no ekipamentu ba prevensaun Coronavirus iha Timor-Leste

Ministru Negósiu Estranjeiru no Kooperasaun (MNEK) Dionísio Babo Soares, hateten governu foti desizaun ne’e atu evita manobra hosi kompaña sira atu sosa ai-moruk no ekipamentu ho loloos hodi evita ai-moruk falsu.

Notísia Relevante :Xina Entrega Ekipamentu Prevensaun Coronavirus ba TL

Logotipu UNDP

“Ita halo buat sira ne’e liuhosi Organizasaun Mundiál Saúde kolabora mós ho Nasaun Unidas maka bele kompra ai-moruk no ekipamentu sira ne’e, ita haree hosi esperiénsia semana kotuk atu haruka kompaña balu sosa maibé iha rai balu sosa ai-moruk hosi kompañia maibé falsu entaun ida ne’e mak ita sei haree didiak,” informa, MNEK Dionísio Babo Soares ba Jornalista sira hafoin reuniaun Konsellu Ministru, kuarta (01/04/2020) iha CCD.

Atu evita erru hirak ne’e maka governu konsulta dadauk ho OMS no UNDP hodi rona opiniaun antes sosa ekipamentu no medikamentu COVID-19 hosi Xina.

Notísia Relevante :OMS Apoiu Ekipamentu Prevensaun Coronavirus ba MS

“Sasán sira ita atu sosa ne’e hosi Xina tanba agora ne’e mundu tomak sosa hosi Xina, agora ita haree presu iha semana kotuk nian la hanesan ho presu ida agora nian,” tenik Babo.

Kona-ba orsamentu hira maka governu aprova hodi sosa ekipamentu hirak ne’e, nia dehan Ministériu Saúde maka responsabiliza.

Jornalista : Hortencio Sanchez

Editór     : Agapito dos Santos

HAKEREK NO HATÁN

Please enter your comment!
Please enter your name here