Diretóra Jerál Prestasaun Saúde, Ministériu Saúde (MS), Odete Viegas da Silva. Imajen/Egas Cristovão

DILI, 01 abríl 2020 (TATOLI)-Governu liuhosi Ministériu Saúde daudaun ne’e iha ona planu sosa tan ekipamentu protesaun ba prevensaun COVID-19 iha tempu badak.

Diretóra Jerál Prestasaun Saúde Ministériu Saúde, Odete Viegas da Silva, hato’o asuntu ne’e hodi responde preokupasaun hosi Servisu Autónomu Medikamentu no Ekipamentu Saúde (SAMES) kona-ba menus ekipamentu protesaun Coronavirus hanesan maskara, oklu, luvas, roupa protesaun no seluk tan.

Notísia Relevante :Estoke Ekipamentu Prevene COVID-19 Menus

Nia dehan situasaun ne’e akontese, tanba governu enfrenta hela problema falta orsamentu, maibé Ministériu Saúde sei aselera prosesu aprovizionamentu ministériu nian hodi sosa ekipamentu hirak ne’e iha tempu badak.

“Ita hatene aprovizionamentu no prosesu finanseira mós la’ós fasil, presiza tempu, maibé importante mak ami asegura ba kazu ne’ebé mak iha emerjénsia no estoke mós tenke iha para ita atende ema moras sira”, katak nia ba jornalista sira iha Sentru Konvensaun Dili (CCD-sigla portugés) ohin.

Nia rekoñese ekipamentu protesaun ne’e menus ona iha armazein SAMES Kampung-Alor Dili, maibé sei iha estoke atu responde pedidu urjente sira hosi médiku, Polísia Nasionál Timor-Leste (PNTL), FALINTIL-Forsa Defesa Timor-Leste (F-FDTL), no jornalista sira.

“Ita atu haree ba profisionál saúde sira ne’ebé servisu iha baze atu atende públiku inklui mos instituisaun Governu sira barak husu, maibé ita presiza haree no ita presiza limita’,’ Odete esplika liután.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here