Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 01 abríl 2020 (TATOLI) – Governu liuhosi reuniaun Konsellu Ministru (KM) halo alterasaun dahuluk ba Dekretu Governu númeru 1/2020, loron 15 janeiru, kona-ba Ezekusaun Orsamentál iha Rejime Doudesimál iha tinan finanseiru 2020 nian.

Projetu Dekretu Governu ne’ebé hetan aprovasaun ne’e, aprezenta husi Ministra Finansa ein ezersísiu, Sara Lobo Brites.

“Alterasaun ida-ne’e atu fó dalan hodi realiza atividade normál Estadu nian no iha mós posibilidade ba ezekusaun despeza públika sira to’o limite ne’ebé mak fixa ona iha Orsamentu Jerál Estadu (OJE) uluk nian, inklui estabelese konjuntu ida hodi salvaguarda no garante jestaun ida-ne’ebé prudente ba dotasaun orsamentál”, refere nota ne’ebé fó-sai hosi ezekutivu sira hafoin soru-mutu KM ne’ebé hala’o iha Sentru Konvensaun Dili (CCD-sigla portugés), kuarta ne’e.

Nota ne’e relata liután, diploma ne’e prevee konjuntu ezekusaun rejime doudesimál no iha posibilidade hodi rezolve konjuntu husi ameasa ne’ebé impede ona Estadu, hodi kumpre integralmente ninia obrigasaun hanesan resposta ba situasaun emerjénsia atuál husi pandemia COVID-19, inklui krize ekonómiku.

Aleinde ne’e, atuál Vise-Ministra Finansa ne’e, aprezenta mós projetu Dekretu Governu ida, ne’ebé aprova ona husi KM.

Diploma ne’e refere ba alterasaun dahuluk husi Dekretu Governu númeru 3/2019, loron 27 marsu, kona-ba ezekusaun OJE 2019.

Alterasaun ne’e mós, fó dalan hodi realiza despeza ne’ebé iha relasaun ho prevensaun no kombate COVID-19, ho forma urjénsia, hanesan despeza ne’ebé relasiona ho servisu aviasaun no kontribuisaun sira hodi organizasaun servisu internasionál, antes ba efetiva prestasaun servisu ka entrega ba sasán sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here