Estrada iha área Suku Oileu, Postu Administrativu Bobonaro, Munisípiu Bobonaro, besik atu kotu hafoin rai udan makaas iha fulan janeiru too marsu 2020. Imajen/Eugénio Pereira

BOBONARO, 01 abríl 2020 (TATOLI)-Autoridade Suku Malilait, Postu Administrativu Bobonaro, Munisípiu Bobonaro, husu ba Ministériu Obras Públika (MOP) atu hadi’a estrada ho kondisaun  aat hosi Postu Administrativu Maliana ba Bobonaro nian ne’ebé atu kotu.

Notísia Relevante : Komunidade Bobonaro Preokupa Eletrisidade no Estrada

Estrada ne’e tohik maka’as no bainhira udan-boot tan iha tempu badak maka bele halo estrada kotu no prejudika movimentu transporte atu asesu hosi Maliana ba Bobonaro.

Xefe Suku Malilait, Mário de Jesus, dehan, udan-boot ne’ebé akontese durante janeiru too marsu 2020, halo bee-tun makaas konsege sobu estrada no halo rai monu hodi afeta makaas ba kondisaun estrada balun iha área Oeleu no Ilibole nian.

Mário dehan, oras ne’e daudaun movimentu transporte terrestre la’o tenke ho kuidadu tebes  tanba rai-monu halo estrada atu  kotu ona.

“Estrada iha parte Oileu no Ilibole nian rai halai no estrada atu kotu ona,” hateten Xefe Suku Máriode Jesus,  ba Ajénsia Tatoli, ohin, iha Sede Suku Malilait, Bobonaro.

Udan halo drenajen balun monu no nakfera no rai-halai taka estrada no kria tahu sa’e makaas afeta ba movimentu transporte públiku.

Tuir observasaun Ajénsia Tatoli nian nota katak, daudaun ne’e estrada balun komesa aat no atu kotu, tanba udan no halo rai monu.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here