Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 01 abríl 2020 (TATOLI)–Ministru Negósiu Estranjeiru no Kooperasaun, Dionisio Babo Soares, hateten Diplomata Timoroan ida iha Nasaun Filipina ne’ebé kona pandemia globál COVID-19 daudaun ne’e sai ona hosi sala Intensive Care Unit (ICU) hodi muda ba sala tratamentu normál tanba kondisaun saúde kontinua hatudu progresu di’ak.

“Ita-nia diplomata ne’e di’ak uitoan ona. Loron hira ba kotuk ne’e nia iha ICU agora muda ona ba sala normál maibé kontinua halo tratamentu,” tenik Ministru Dionísio Soares Babo ba jornalista sira iha Sentru Konvensaun Dili (CCD-sigla portugés), kuarta ne’e.

Babo garante ho ekipamentu no tratamentu hosi ekipa médiku sira iha Filipina sei tulun diplomata timoroan ne’e atu rekupera lalais hosi moras ne’e iha tempu badak.

“Timoroan hotu labele pániku. Fiar metin sistema saúde iha estranjeiru ne’ebé avansadu timoroan ne’e bele di’ak lalais,” nia hatutan.

Notísia Relevante :Kondisaun Saúde Diplomata Timoroan Hatudu Progresu Pozitivu

Maski COVID-19 daudaun ne’e infiltra iha nasaun hotu iha mundu, maibé MNEK to’o ohin seidauk simu tan informasaun hosi embaixada no konsuladu sira iha diáspora katak timoroan balun kona tan ona coronavirus.

“Timoroan sira iha li’úr hotu-hotu di’ak maski moras ne’e iha mundu tomak maibé to’o agora ita seidauk simu relatóriu ida katak timoroan maioria iha li’úr kona moras ne’e,” tenik Babo.

Tuir informasaun katak timoroan iha diáspora daudaun ne’ee izola an iha ida-idak nia uma tanba proibidu atu halo movimentu iha fatin públiku.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here