Ilustrasaun Coronavírus. Imajen/bncampinas.com

DILI, 01 abríl 2020 (TATOLI) – Timor-oan sira ne’ebé hela iha fatin kuarentena hamutuk 18, ne’ebé estabelese ona husi Governu liuhosi Ministériu Saúde, inklui auto-kuarentena ka hela iha uma ba ema ne’ebé husi nasaun afetadu COVID-19 hamutuk 1.231.

Tuir dadus provizóriu ne’ebé Agência Tatoli asesu husi  portál Sekretaria Estadu Komunikasaun Sosiál (SEKOMS), kuarta ne’e, timor-oan ne’ebé rejistadu iha Komisaun Nasionál COVID-19 hahú tama husi loron 6 to’o 31 marsu.

Totál númeru ema hamutuk 1.231 ne’e, kompostu husi auto-kuarentena iha uma hamutuk na’in-589, kompostu husi ne’ebé maka pasa ona kuarentena durante loron 14 hamutuk na’in-243 no sei hetan akompañamentu hamutuk na’in-348.

Entretantu, iha kuarentena hamutuk 18 ne’ebé estabelese husi Governu hanesan, kuarentena  A na’in-71, kuarentena B hamutuk 128, kuarentena  C hamutuk 27, kuarenta D hamutuk 31, Kuarentena E hamutuk 35, Kuarentena F hamutuk 22 kuarentena G hamutuk 30,  kuarentena H hamutuk 27,  kuarentena I hamutuk 25, kuarentena J hamutuk 30, kuarentena K hamutuk 29,  kuarentena L hamutuk 35, kuarentena M hamutuk 14, kuarentena N hamutuk 14,  kuarentena O hamutuk 32, kuarentena P hamutuk 52, Kuarentena Q hamutuk 40  ho totál 988.

Aleinde ne’e, suspeitu kazu COVID-19 ne’ebé rejista ona iha Timor-Leste hamutuk 11, positivu +1 no mate 0.

Kuarentena 18 ne’e Governu liuhusi Minitériu Saúde estabelese atu fásil kontrola sidadaun sira nian, liliu konsulta médiku durante loron 14 hafoin laiha sitoma COVID-19 maka bele fila ba uma, enkuantu iha sintoma bele foti amostra raan no analiza, bainhira deteta pozitivu bele muda ba izolamentu.

Dadaun ne’e ekipa médiku halo observasaun no vijilánsia ba ema na’in-252 ne’e iha kuarentena haat ne’ebé estabelese ona.

Antes ne’e, Diretora Nasionál Kontrolu Moras, Ministériu Saúde, Josefina Clarinha João, hateten  iha situasaun emerjénsia hanesan ne’e Ministériu Saúde liuhosi ekipa vijilánsia ba COVID-19 kontinua esforsu-an atu kordena no kolabora ho ekipa sira iha aeroportu atu halais atendementu ho di’ak ba sidadaun sira husi nasaun afetadu sira.

“Ita mós rekursu umanu no transporte  limitadu ne’ebé tenke sai ita nia sasukat atu presiza pasiénsia hodi hein prosesu”, dehan nia.

Diretora ne’e adianta, ekipa Diresaun Nasionál Kontrolu Moras mak iha resposabilidade ba timo-oan sira ne’ebé mai husi nasaun afetadu hodi lori ba kuarentena.

Jornalista: Florencio Miranda Ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here