Xefe Suku Malilait, Mário de Jesus.Imajen/Eugénio Pereira

BOBONARO, 01 abríl 2020 (TATOLI)- Autoridade Suku Malilait, Postu Administrativu Bobonaro, Munisípiu Bobonaro, hamutuk ho família-sira rekolla ona restu mortais hamutuk 180.

Notísia Relevante : Estrada Maliana Ba Bobonaro Besik Atu Kotu

Restu mortais hirak-ne’e nu’udar martires ne’ebé mate tanba defende ukun rasik-aan hahú hosi 1975 to’o mai 1999.

Xefe Suku Malilait, Mário de Jesus dehan, restu mortais sira-ne’e família saudozu-sira no autoridade-sira rekolla hafoin, Governu Timor-Leste harii Komisaun Rekolla Restu Mortais ne’ebé lidera hosi Sekretáriu Estadu Veteranu, Kombatente no Libertasaun Nasionál (SEVKLN).

“Agora daudaun família-sira rekolla ona restu mortais hamutuk 180 maka rai hela iha sede suku para hein desizaun Governu Timor-Leste,” informa Xefe Suku Mário de Jesus, ba Ajénsia Tatoli, ohin,  iha Sede Suku Malilait, Bobonaro.

Restu Mortais ne’e kompostu husi Suku Malilait, Lourba no Bobonaro Vila  no autoridade-sira hato’o ona proposta ba governu atu prepara monumentu ka uma mahon, maibé tanba situasaun polítika la’o hela prejudika  prosesu tomak.

Nia dehan, família ho autoridade-sira balun tau ona kontribuisaun hodi sosa hena hodi nahe iha meza, lilin no ai-fuan rai iha fatin restu mortais hodi hein too governu deside harii ona osóariu foin muda restu mortais sira ne’e.

Xefe Suku ne’e hatutan, Autoridade Suku Malilait rasik durante ne’e prepara ona rai ektare haat (4) iha foho tutun Malilait hodi harii osóariu ne’e.

Nia hatutan, durante ne’e autoridade suku no veteranu Bobonaro kontinua koopera ho família hodi buka nafatin restu mortais balun ne’ebé mate durante funu 1975 too 1999.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here