Negosiante Mini Restaurante, Loes-Kefe (RELOKE), Aquelina Palbeno. Imajen/Eugénio Pereira

LOES, 01 abríl 2020 (TATOLI)- Negosiante-sira ne’ebé halo atividade negósiu iha área Loes, Suku Vatuboro, Postu Maubara, Munisípi Liquiça no área Bicari, Postu Administrativu Atabae, Munisípiu Bobonaro, taka provizóriu sira-nia atividade negósiu hodi kontribui prevene-aan hosi pandemia Coronavirus ka COVID-19.

Atividade taka loja, kioske no fa’an sasán ne’e hahú kedas iha loron 28 marsu liubá, hafoin Prezidente Repúblika, Francisco Guterres “Lú Olo” dekreta estadu emerjénsia.

Na’in ba Loes-Kefe (RELOKE), Aquelina Palbeno, hateten, sira-hotu taka atividade negósiu provizóriu ne’e hodi kumpre regra estadu emerjénsia. Maski nune’e, iha dekretu Governu no regra Estadu emerjénsia nian la bandu atu negosiante ambulante, loja, supermerkadu no kioske-sira atu taka sira-nia atividade negósiu.

“Ami koopera ho desizaun estadu emerjénsia hodi ita hotu- hotu prevene-aan hosi pandemia Coronavirus ka COVID-19 ne’ebé ami rasik akompaña iha média fó sai atu sidadaun hotu- hotu koopera hodi ita prevene-aan,”  informa e Aquelina hodi respeonde Ajénsia Tatoli, ohin, iha Loes.

Nia dehan, mezmu desizaun estadu deside hapara atividade-sira hahú loron 28 marsu too 26 abríl, fó impaktu uitoan ba sira-nia rendimentu, maibé sira la tau ba kestaun,  tanba bele prevene-aan hosi COVID-19.

“Ami sente desizaun estadu ne’e afeta duni ba ami nia negósiu, maibé ami kumpre hodi próteze ami no ita hotu  nia saúde,” nia tenik.

Aquelina hahú loke e negósiu fa’an sasán nesesidade báziku no loke mini restaurant hodi fa’an katupa, ikan, na’an manu Timor no hahán sira-seluk hanesan batar dezde tinan 2006 too agora.

Nia hatutan, rendimentu ne’ebé kada loron nia hetan hosi atividade negósiu ne’e mínimu-liu maka $50.00 no boot-liu mak $100.00. Mas, rendimentu loron-loron variable la’ós permanente.

Tuir observasaun Ajénsia Tatoli nota katak, atividade negósiu iha área Loes nian ne’ebé loroloron rame, ohin, la hanesan ho loron baibain ona, tanba atividade negósiu-sira paradu inklui transporte públiku sira hanesan bis, angguna no transporte públiku sira ladún hala’o movimentu ba mai.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here