Prezidente Partidu Demokrátiku (PD), Mariano Assanami Sabino. Imajen/António Gonçalves.

DILI, 01 abríl 2020 (TATOLI)—Deputadu Bankada Demokrátiku (PD), Mariano Assanami Sabino, propoin ko’a saláriu membru deputadu no membru Governu hodi fó apoia nesesidade povu nian relasaun ho situasaun ekonómika atuál.

“Ha’u hanoin ita reprezenta povu, membru Governu, ha’u koloka de’it ba ita hotu nia konxiénsia karik bele iha situasaun ida difísil hanesan ne’e, ita mós la full ona mai serbisu. Se bele, ita-nia saláriu %50 ne’e ko’a, liuliu atu haree lalais sira-ne’ebé moras iha ospitál, ba doutór no infermeira sira, ba membru polísia sira ne’ebé halo serbisu loron no kalan,” Deputadu PD, Mariano Assanami Sabino, rekomenda iha ámbitu pedidu levantamentu millaun $250 liuhosi plenária Parlamentu Nasionál, kuarta ne’e.

Nia halo predisaun katak, se deputadu sira ko’a %50 bele to’o ona dolár rihun $90-resin.

“Membru Governu sira-nian aumenta tan bele responde ona nesesidade bázika sira iha situasaun atuál,” nia dehan.

Assanami ko’alia asuntu ne’e tanba orsamentu atu resposta COVID-19, dezastre naturál no normaliza atividade ekonómika seidauk iha.

“Ba ha’u, povu hein hela mak proposta adisionál ida atu responde ba COVID-19 ho inundasaun ho karáter urjénsia, entaun hanoin katak ita bele aprova ona orsamentu ida-ne’e para ezekusaun ne’e se bele semana ida-ne’e komesa la’o ona,” nia hateten.

Entretantu, Deputada KHUNTO, Olinda Guterres, konkorda ho ideia Mariano Assanmi Sabino nian tanba oras ne’e funsionáriu setór privadu barak mak iha ameasadu.

“Tuir ha’u-nia hanoin ko’a ami deputadu sira-nia sálariu %50 hodi selu funsionáriu setór privadu sira-ne’ebé oras ne’e iha ameasadu. Ha’u konkorda ho ideia Assanami,” nia dehan.

Purtantu, deputadu sira seluk la foti asuntu ne’e iha plenária Parlamentu Nasionál.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here