DILI, 31 marsu 2020 (TATOLI)–Sekretáriu Estadu ba Formasaun Profisionál no Empregu, Julião da Silva, informa dadaun ne’e traballadór timoroan iha nasaun Korea Súl no Austrália livre husi moras COVID-19, maski país rua ne’e afetadu ona ho virus ne’e.
“Ita-nia traballadór sira iha Korea súl no Austrália seidauk afetadu ba Coronavírus,” tenik Sekrétariu Estadu ne’e ba iha Palásiu Governu, tersa ne’e.
Nia informa, daudaun ne’e iha traballadór timoroan 3.000-resin maka servisu iha Korea Súl no 1.000 maka servisu iha Austrália. Sira kontinua tuir regulamentu no orietasaun ne’ebé fó-sai husi médiku sira, nune’e bele prevene-an husi Coronavírus.
“Ita husu ona adidu atubele asegura ita-nia sidadaun sira, nune’e labele afeta ba vírus ne’e”, nia akresenta.
Nune’e, governnate ne’e husu ba traballadór sira atu kuidadu-an, asegura saúde, no rona orientasaun ka regulamentu sira ne’ebé la’o iha Koreia Súl no Austrália hodi hein desizaun tuirmai ne’ebé Governu Timor-Leste sei foti tanba sistema saúde iha nasaun sira ne’e di’ak tebes.
“Husu ba ita-nia traballadór sira, labele sai ba fatin arbiru, liuliu sidade ne’ebé afetadu. Tanba ne’e, tenke kuidadu-an no kontinua nafatin utiliza ekipamentu médiku protejidu ne’ebé fó sai husi médiku sira”, nia sujere.
Antes ne’e, Ministru Negósiu Estranjeiru no Kooperasaun, Dionísio da Costa Babo Soares, hateten Governu Timor-Leste fó fiar nafatin ba sistema saúde iha Koreia Súl no Austrália atu proteje traballadór timoroan sira.
Ministru Dionísio dehan Embaxadór Timor-Leste iha Koreia súl, hamutuk ho adidu traballadór kontaktu ona traballadór timoroan sira atu kuidadu-an no tuir regulamentu médiku sira atu prevene husi COVID-19.
Jornalista: Florencio Miranda Ximenes
Editora: Julia Chatarina
