Diretór Jerál Empregu SEPFOPE. Paulo Alves Imajen TATOLI/Egas Cristovão

DILI, 31 marsu  2020 (TATOLI) – Iha loron hirak liubá, Prezidente Repúblika dekreta ona Estadu Emerjénsia relasiona ho surtu globál COVID-19, tanba ne’e instituisaun balun tantu públiku no privadu feriadu ona no balun servisu, maibé kona-ba saláriu Governu seidauk define.

Ba kestaun ne’e, Diretór Jerál Empregu Esteriór, Paulo Alves, husu durante períodu Estadu Emerjénsia, kompañia sira labele ko’a saláriu traballadór nian tanba situasaun maka obriga.

“Ita-nia traballadór balun kontaktu ona ha’u no Sekretáriu Estadu Formasaun Profisionál no Empregu, nune’e husu ba kompañia sira labele viola direitu saláriu traballadór nian. Husu kompañia sira tenke komprende situasaun ida agora”, nia dehan iha salaun Sekretaria Estadu Formasaun Profisionál no Empregu (SEPFOPE), Caicoli, tersa ne’e.

Tuir governante, situasaun ida agora tenke tolera tanba moras ne’e halakon ona ema-barak nia vida.

“Ita nian nasaun liuhosi Xefe Estadu dekreta ona Estadu Emerjésia atu prevene husi Coronavírus, tanba peste ne’e perigu tebes no bele afeta ba saúde públika. Tanba ne’e empreza sira tenke komprende situasaun sira ne’e. Ha’u ko’alia realidade”,Paulo Alves akresenta.

Nia subliña, husi parte SEPFOPE, prontu atu asegura traballadór timor-oan sira ne’ebé maka servisu iha kompañia sira.

“Ita iha lei traballadór ne’ebé regula katak saláriu mínimu maka $115, atu dehan de’it ba públiku katak ligadu ho Coronavírus ne’ebé akontese, kompañia tenke hatene kona-ba osan insentivu ba traballadór nian, empreza sira fó ka la’e. Polítikamente ami labele hatán tanba ne’e liga ba asuntu nível politika”, dehan Diretór Jerál ne’e.

Nune’e, Dirijente ne’e husu ba loja sira ne’ebé Governu deside taka ne’e tenke taka tanba situasaun maka la permite maibé loja no supermerkadu ne’ebé maka loke, empreza sira ne’e tenke garante sira ninia traballadór no tenke proteje sira tanba agora ne’e ho situasaun Coronavírus

“Kuandu iha empreza sira maka laiha instrumentu atu proteje ninia traballadór iha servisu fatin, ida-ne’e ita iha Inspesaun Jerál Traballu sei tun halo inspesaun, hodi haree kondisaun sira ne’e kuandu la tuir maka empreza sira sei hetan sansaun tuir lei traballu nian”, nia adianta.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here