Komandu Polísia Munisípiu Dili halo operasaun iha Timor Plaza. Imajen/Eugénio Pereira

DILI, 31 marsu 2020 (TATOLI)-Komandu Polísia Munisípiu Dili, ohin, kontinua ezekuta orden serbisu hodi halo auto stop iha estrada no tama-sai loja no supermerkadu hodi haklaken mensajen estadu emerjénsia.

Notísia Relevante : PNTL La Admite Família Hasoru Abitante iha Kuarentena

Ba loja-siran ne’ebé fa’an nesesidade bázika bele kontinua loke no halo atendimentu ba públiku, maibé tenke prepara bee-moos ho sabaun hodi fasilita kompradór-sira fase-liman.

Ba ofisina no loja eletrónika-sira, Komandu Polísia Munisípiu Dili husu taka provizóriu hodi kumpre ba regra estadu emerjénsia no prevene pandemia Coronavirus ka COVID-19.

Iha sosializasaun ba loja ho supermerkadu-sira ne’e, Komandante Polísia Munisípiu Dili, Superintendente Xefe, Armando Monteiro ho Segundu Komandante Superintendente Euclides Belo, esplika, ba loja-sira katak, tuir desizaun estadu nian só autoriza loja boot-sira ne’ebé fa’an sasán nesesidade bázika mak bele loke, no ba loja ki’ik-sira ne’ebé fa’an sasán eletrónika hanesan telephone, televizaun, ropa, ofisina no fatin fa’an karreta ho motór-sira di’ak liu taka.

“Ba atividade-sira ne’ebé la nesesita ba atendimentu nesesidade bázika  tenke minimiza  no taka hodi labele fó risku ba sira no traballadór-sira ba pandemia Coronavirus ka COVID-19,”  hateten Komandante Armando Monteiro ba jornalista, ohin, iha Timor Plaza, Dili.

Iha operasaun ne’e, loja ki’ik-sira ne’ebé halo atividade tipografia no loja-sira ne’ebé fa’an telefone no ropa balun kumpre regra hodi hahú taka kedas sira nia atividade no haruka traballadór-sira fila uma.

“Dezde sesta semana kotuk ami mai sosializa ba loja sira katak atividade ekonomikamente la’o normál, maibé loja tenke prepara kondisaun tuir protokolu Organizasaun Mundiál Saúde (OMS) no tuir dekretu lei númeru 3/2020, hodi prepara bee-moos no sabaun hodi fasilita kompradór-sira no tama-sai loja tenke fase liman,” dehan Armando.

Komandante Armando Monteiro dehan, PNTL liuhosi unidade hotu- hotu dezde  sábadu too ohin kontinua halo pasa revista ba sidadaun-sira atu kumpre regra distánsia sosiál bainhira sa’e motór tenke ema ida de’it no uza karreta labele liuhosi ema na’in haat (4).

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here