PNTL halo operasaun iha Dili-laran. Imajen/Eugénio Pereira

DILI, 31 marsu 2020 (TATOLI)- Komandu Polísia Munisipiu Dili la admite atu família hasoru abitante-sira iha kuarentena-laran.

Notísia Relevante : Dezobediénsia ba Regra Estadu Emerjénsia, Polísia Detein Joven Balun

Komandante Polísia Munisípiu Dili, Superintendente Xefe Armando Monteiro dehan, governu hasai ona regra atu sidadaun-sira ne’ebé hela iha kuarentena hakmatek hodi submete ba observasaun ekipa médiku durante loron 14 nia-laran.

“Ita apela mós ba família-sira atu labele ba hasoru família iha kuarentena ne’ebé governu estabelese,” hateten  Armando Monteiro, ohin, ba jornalista iha Timor Plaza, Dili.

Polísia Munisípiu Dili hetan apoiu seguransa husi Unidade Espesiál Polísia (UEP) simu ona orientasaun hodi la autoriza kualkér família inklui jornalista-sira atu tama iha uma kuarentena sira ne’e.

Fatin kuarentena provizóriu ne’ebé Governu Timor-Leste estabelese ona mak hanesan, Otél Novo Horizonte, Otél Audian, INAP, Otél D’City,  Fantija, Otél Colmera, Otél Luxury, Otél Faról, Tibar, Otél Viana, Otél Vila-Verde, Otél Luz Clarita, Otél Fortuna, Fatin Madre FMA São João Paulo (simu feto de’it), Carla Mansion ka Guest House, Otél Lesidere ho Sentru Nasionál Empregu Profisionál, Tibar.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here