Imajen tatoli/António Goncalves

DILI, 31 marsu 2020 (TATOLI)—Parlamentu Nasionál (PN) liuhosi Komisaun C (Finansa Públika) preokupa Ministériu Finansa hasa’e proposta adisionál ba millaun $150.

Vise-Prezidente Parlamentu Nasioál, Deputada Maria Angelina Sarmento Lopez, hateten parlamentu sei foka de’it pedidu levantamentu millaun $250 hosi fundu petrolíferu la’ós proposta adisionál millaun $150.

Purtantu, nia hatutan, iha loron domingu ne’e Konsellu-ministru aprova proposta millaun $100 hodi kombate Coronavirus, atu halo rekuperasaun ba ekonómika no atu fó apoia sosiál ba dezastre naturál durante inundasaun.

“Maibé 30 de marsu horisehik Ministériu Finansa husu tán adisionál millaun $50 maibé momentu iha audiénsia ami la rona, ministra só hato’o de’it millaun $100, tanba ne’e maka kestiona hela ida-ne’e.  Maibé relatóriu no pareser ohin ne’e Komisaun C aprova ba pedidu millaun $250 ne’e. Agora adisionál millaun $150 ne’e ami husik lori mai iha plenária, Governu justifika depois deputadu sira deside hamutuk, halo konsensu ka kontinua mantein ho millaun $250, atu fó tán millaun $150 ne’e, depende ba plenária,” Vise-Prezidente Parlamentu Nasionál, Maria Angelina Sarmento Lopez, informa ba jornalista sira iha Parlamentu Nasionál, tersa ne’e.

Vise-Prezidente PN ne’e konsidera proposta adisionál ne’e hanesan verbal de’it tanba ne’e sei husu justifikasaun Governu nian kona-ba pedidu adisionál ne’e.

“Semana kotuk Governu justifika ona millaun $100 no atu halo prevensaun COVID-19 no inundasaun maibé aumenta tán millaun $50 ne’e, ami presiza hetan justifikasaun hosi Ministériu Finansa,” nia dehan.

Nia afirma, loloos ne’e Komisaun C halo audiénsia ho Ministériu Finansa tanba saida saida mak millaun $100 sa’e ba millaun $150.

“Maibé pedidu verbál no pedidu eskrita sa’e ba millaun $150 ne’e ami sei lori ba plenária maka husu konsensu ka votu konsensu hosi deputadu sira. Ne’e la’ós karáter urjénsia, ne’e hanesan pedidu verbál ida ne’ebé la tama iha proposta lei tanba proposta lei ne’e deskreve de’it millaun $250,” nia hateten.

Membru Komisaun C ne’e mós preokupa ho deklarasaun Ministra Finansa Ein-Ezersísiu atuál Vise-Ministra Finansa, Sara Lobo Brites, ne’ebé halo aprezentasaun kona-ba kálkulu gastu hahú hosi janeiru tanba seidauk iha Orsamentu Jerál Estadu to’o fulan-juñu.

“Maibé audiénsia semana kotuk Ministra Finansa Ein-Ezersísiu hatete katak orsamentu ne’ebé provavelmente sei iha resta to’o fulan-juñu, até outubru ne’e sei iha millaun $85 maibé dokumentu ne’ebé foin tama mai Komisaun C simu, osan ne’ebé resta até juñu ne’e hela de’it millaun $20-resin. Ida-ne’e sai pergunta ba ami tanba saida mak iha plenária Ministra Finansa deklara millaun $85 maibé dokumentu ne’ebé ami simu to’o juñu millaun $20 de’it,” Deputada PLP ne’e hateten.

Entretantu, ohin tuku 16h00, Parlamentu Nasionál hala’o diskusaun no aprovasaun iha faze jeneralidade, espesialidade no finál globál ba proposta lei númeru 13/V(2a)-autorizasaun ba realizasaun transferénsia estraordinária hosi fundu petrolíferu.

Nune’e mós Parlamentu Nasionál sei hala’o diskusaun no votasaun ba projetu rezolusaun númeru 52/2020kona-ba adosaun medida prevensaun no kombate COVID-19.

Notísia Relevante: Komisaun C Seidauk Konklui Relatóriu no Pareser Ba Pedidu Levantamentu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here