Diretór Institutu Defeza Nasionál (IDN) no Atual Gabinete Jestaun Krize, Donaciano Costa Gomes "Pedro Klamar Fuik" Prezide Reuniaun Interministerial Kona-ba Prevensaun COVID-19 iha CCD, Segunda (30/03). Imajen/Egas Cristóvão

DILI, 31 marsu 2020 (TATOLI)-Kordenadora Jerál Ekipa Inter-Ministeriál COVID-19, Odete Viegas da Silva, hateten ba oin, Ministériu Turizmu Komérsiu Indústria (MTCI-sigla portugés) maka sei responsabiliza ba akomodasaun no alimentasaun ba sidadaun sira ne’ebé oras ne’e hela iha kuarentena.

Enkuantu, Ministériu Ministériu Transporte Telekomunikasaun (MTT) sei responsabiliza oinsá atu organiza karreta hodi tula abitante sira bainhira tuun iha aeroportu Comoro no fronteira Terestre hodi desloka ba fatin kuarentena hamutuk 17 ne’ebé dadaun ne’e governu kontratu ona hanesan otél no edifísiu públiku sira iha Dili.

Desizaun ekipa inter-ministeriál, tersa (31/03/2020) importante atu oinsá fó responsabilidade ba Liña Ministeriál atu servisu hodi prevene COVID-19, la’ós kna’ar MS nian de’it.

”Ohin ami enkontru ne’ebé mak nota ona no mós fo benifisiu ba Ministériu Saúde katak fahe ona tarefa idak-idak nian hodi nunee bele fasilita liután Ministériu Saúde nia servisu,”dehan Odete Viegas da Silva ba jornalista sira iha CCD, tersa (31/03/2020).

Ho desizaun ne’e maka hahú kuarta (01/04/2020), Ministériu Saúde sei toma konta de’it ba dezlokasaun ekipa vijilánsia Saúde nian iha fatin kuarentena sira hodi fó tratamentu saúde ba okupante sira bainhira iha nesesidade.

”Ida ne’e mak hahú aban ba oin sei la’o atu nune’e bele fasilita liután Ministériu Saúde nian servisu,”tenik tan.

MTKI ho MS sei halo ajustamentu dadus kona-ba Otél no kompaña hira maka governu kontratu ona hodi fó atendementu ba Timoroan no Estranjeiru sira iha fatin kuarentena.

Jornalista : Felicidade Ximenes

Editór        : Agapito dos Santos

HAKEREK NO HATÁN

Please enter your comment!
Please enter your name here