Ministru Justisa, Manuel Cárceres da Costa. Imajen/Antonio Goncalves

DILI, 31 marsu 2020 (TATOLI) – Ministériu Justisa (MJ) hasai ona sirkulár ministeriál  hodi limita atendimentu servisu ministériu nian hodi kumpre ba social distancing ka evita halibur-malu iha serbisu fatin.

Maski nune’e, MJ komprometidu hala’o atendimentu ba públiku ne’ebé nesesita ka ho karater urjénsia.

Komunikadu imprensa ne’ebé fó sai hosi Ministériu Justisa, tersa (31/03/2020), relata katak, tuir situasaun pandemia Coronavirus ka COVID-19 no aplikasaun estadu emerjénsia tuir dekretu Prezidente Repúblika no mós medida hirak ne’ebé regula ho Dekretu Governu númeru 3/2020, 28 marsu, Ministériu Justisa hakarak informa ba públiku katak, vizita ba dadur-sira iha dadur fatin Becora, Gleno no Suai, sei suspende to’o loron 27 abríl 2020, exeptu vizita atu fó asisténsia legál ka vizita ho karater umanitária ne’ebé labele adia.

Ministru Justisa Manuel Cárceres mós hasai ona sirkulár ida durante estadu emerjénsia ba funsionamentu serbisu-sira sei nafatin fó atendimentu esensiál hosi Servisu Diresaun Jerál Servisu Rejistu no Notariadu (DGSRN) Polícia Científica  Investigação Criminal (PCIC), Defensoria Públika, no Servisu Prizionais iha Munisípiu no Rejiaun ne’ebé iha kartóriu servisu Ministériu Justisa nian.

Hanesan Servisu Notariadu sei atende de’it, ba rejistu de Nascimento-rejistu moris ne’ebé urjente, entrega Billete Identidade no sertidaun ne’ebé hasai tiha ona molok loron 30 marsu, Pasaporte ba ema-sira ne’ebé presiza atu halo evakuasaun moras, pasaporte diplomátiku ka pasaporte servisu nian ne’ebé urjente no mós billete identidade ne’ebé ninia validade mate iha loron ne’ebé sira-mai husu, no mós Testamentos hirak ne’ebé urjente no la bele adia.

Ba billete  identidade, pasaporte hirak ne’ebé atu uza de’it ba identifikasaun iha territóriu nasionál, sertidaun no sertifikadu hirak ne’ebé ninia validade mate hahú loron 28 marsu, sei konsidera prorrogados-vale nafatin enkuantu Dekretu  Governu n.º 3/2020, 28  marsu sei vigora to’o loron 31 de jullu 2020.

Ba kontratu arrendamentu imóveis estadu nian hirak ne’ebé ninia durasaun hotu iha loron 30  marsu, konsidera automatikamente renovadu tuir tempu ne’ebé Dekretu Governu n.º 3/2020, 28 de marsu sei vigora, karik arrendatariu-sira sei hakarak hanaruk kontratu hirak ne’e.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here