Imajen Espesiál.

DILI, 31 marsu 2020 (TATOLI)–Elefante (odas) mate husik hela dikur, ema mate husik hela naran. Ida ne’e mak akontese ba matebian Oggy Ozman. Maski nia mate ona maibe ninia naran no liafuan importante sira ne’e, ema sei hanoin hetan ba nafatin.

Artista Múzika no Kantora, Joana Vila Nova, nu’udar matebian Oggy Ozman nia kolega, haktuir matebian Oggy Ozman sempre fo korajen no tatoli ba nia família sira katak edukasaun mak importante ba futuru.

Artista Múzika, Joana Vila Nova. Imajen Tatoli/Osória Marques.

“Matebian Oggy Ozman dehan ba família sira katak edukasaun importante ba ita-nia future. Tanba ne’e, estuda makaas sai matenek tanba edukasaun mak xave ba futuru,” dehan Artista Múzika no Kantora, Joana Vila Nova, ba ba Ajénsia TATOLI iha matebian nia rezidénsia, Bidau Masau, Dili, ohin.

Durante ne’e, nia hatutan, matebian sempre enkoraja família no juventude sira katak tenke hamutuk no ajuda malu bainhira ema ruma monu iha difikuldade ka terus ida-nia laran.

“Bainhira ita la hamutuk mak ita sei la halo buat ida. Tanba ne’e buat ne’ebé ami aprende husi matebian Oggy Ozman mak tenke hamutuk no ajuda malu iha tempu saida de’it,” Joana Vila Nova informa ho tanis.

Nia dehan, sente lakon boot tanba matebian Oggy Ozman nu’udar ema ne’ebé laran di’ak no sempre halibur ema hodi fahe ninia esperiénsia ba ema hotu atu hatene.

“To’o agora ha’u labele konta tuir matebian nia esperiénsia nu’udar kantór no sai hanesan Master of Cerimony (MC) iha rai laran no mós iha Internasionál. Tanba, nia halo buat ida ne’e ho fuan no domin,” nia haktuir.

Notísia Relevante: “Oggy ‘Carimbala’ Ozman” Daku Lensu Ró Mós Liu Ona!

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here