Hahán ne'ebé kompañia oferese ba abitante-sira iha kuarentena. Imajen Tatoli/Cipriano Colo

DILI, 31 marsu 2020 (TATOLI)–Ministériu Saúde dadaun ne’e kontratu ona Kompañia Vermeloza Unipesoál Lda, hodi fornese ai-han ba ema na’in-110 ne’ebé hela iha Kuarentena INAP Comoro Dili, no Tibar-Munisípiu Liquiçá.

Diretóra Kompañia Vermeloza Unipesoál Lda, Fátima Jhon, hateten, maski seidauk asina kontratu ho Ministériu Saúde maibé nia parte fornese ona hahán ba okupante kuarentena rua ne’e besik ona semana ida.

Notísia Relevante :Kompaña Neen Forñese Ai-han  ba Kuarentena 17

Hosi ema na’in-110 ne’e, na’in-50 maka hela iha Institutu Nasionál Adminstrasaun Públika (INAP), Comoro no na’in 60 iha Tibar.

Kompañia fornese ai-han loron ida dala tolu, matabixu iha tuku 7:30 oras Timor-Leste, han meudia iha tuku 12:30 no han kalan 17:00 Otl.

Edifisiu INAP: Imajen/Cipriano Colo

Kona-ba menu ai-han, nia esplika matabixu dadeer ho produtu lokál hanesan talas, sasoro kahur ho modo, han meudia maka sopa, ikan no alfase. Enkuantu ba jantár kalan ho menu na’an karau, bife, alfase kompleta ho pipinu.

Nia garante Governu sei halo pagamentu lalais para kompañia bele selu traballadór sira ne’ebé maka servisu durante loron feriadu.

Diretór Nasionál Aprovizionamentu Ministériu Saúde, Bernadino Armando da Silva, hateten governu halo kontratu ho kompañia fornesedór sira hodi fornese hahán ba abitante kuarentena sira  durante fulan-neen, maibé depende evolusaun COVID-19 to’o bainhira maka sei ramata.

“kazu COVID-19 ne’e molok fulan neen ne’e mak laiha ona problema entaun ita termina iha-ne’e maibé to’o fulan neen mak sei nafatin ita kontinua, konserteza prazu kontratu mós ita sei aumenta tan,” nia esplika.

Daudaun ne’e MS estabelese kontratu ho kompañia fornesedór hahán hamutuk neen ho folin $ 9.50 ba kada ema han dala tolu iha loron ida.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here