Komunidade Timor oan sira nebe hela iha kuarentena Hotel Audian tanba foin fila husi rai liui.Imajen/Antonio Goncalves

DILI, 31 marsu 2020 (TATOLI)-Ministériu Saúde halo ajudikasaun direta ba kompaña hamutuk neen hodi forñese ai-han ba Timoroan no sidadaun estranjeiru hamutuk ema na’in  610 maka oras ne’e hela iha kuarentena 17 iha kapitál Dili hodi prevene pandemia globál COVID-19 durante implementasaun estadu emerjénsia.

Kompaña  neen (6) ne’e maka Sunivio Entertaiment Unipesoal Lda, Kompaña Dapur Timor Unipesoál Lda, Vermalhosa Unipesoál Lda, Monte Perere Unipesoál  Lda,  Genivan Unipesoál Lda, no Fantija Catering Unipesoál  Lda ba responde alimentasaun ba okupante Kuarentena durante estadu emerjénsia.

Diretór Nasionál Aprovizionamentu Ministériu Saúde, Bernadino Armando da Silva relata, kada loron abitante ida tenke han dala tolu hanesan matabixu, han meudia no han kalan ho presu $ 9.50 ba ema na’in ida.

Kona-ba kontratu, Ministériu Saúde foin estabelese kontratu ho Kompaña Sunivio Entertaiment Unipesoal Lda, Vermaloza Unipesoál Lda, no Monte Perere Unipasoál Lda, inklui otél Novo Horizonte no Audian.

Maibé Otél D,City, Otél Fantija, Otél Colmera, Luxury otél, Faról Otél, Vila-Verde Otél, Lux Clarita, Fortuna hotel, Hotel Lecidere, Nicole otél hudi-laran, Konventu Madre FMA São João Paulo II no kompaña fornesedór ai-han tolu seluk sei iha prosesu.

“Ita hala’o dadaun prosesu preparasaun pagamentu ba kompaña tolu ne’e tanba sira-nia dokumentu  kompletu hotu ona, ne’e duni la presiza hein tan kompaña seluk no otél sira seluk, depois maka ita prosesa tan sira seluk,” dehan, Bernadino Armando da Silva ba Agência TATOLI, iha ninia servisu fatin Palasiu Sinzas Caicoli, tersa (31/03/2020).

Diretór Nasionál Aprovizionamentu esplika Governu kontratu kompaña forñesedór ai-han ho valor kada ema $ 9.50 no kada loron.

Maibé presu ba otél sira maka iha diferensa exemplu iha Otél Audian kada kuartu ho folin $ 60.00 kada loron, Novo Horizonte Metiaút Dili, iha tarifa presu ba kategoria tolu maka $ 60.00, $ 57.00 no $ 52.00.

Iha Otél Fortuna Hudi-Laran ho Presu $ 40.00, Otél Vila-Verde $ 50.00 maibé iha Konventu Madre FMA São Paulo II ho folin kada kuartu $ 14.00.

Tenik tan, oras ne’e Ministériu Saúde halo ona estimasaun ida katak kada otél no kompaña fornesedór sira sei aloka osan  rihun $ 100 , maibé prosesu pagamentu sei baseia ba relatóriu implementasaun iha terrenu.

Entretantu, Governu oras ne’e estabelese ona Kuarentena hamutuk 17 hanesan, Novo Horizonte, otél Audian, D’City, Fantija, otél Colmera, otél Luxury, otél Faról, otél Viana, otél Vila-Verde, Luz  Clarita, Fortuna, otél Lecidere, INAP Comoro, Tibar, Madre São João Paulo II, Sentru Nasional  Empregu no Formasaun Profesionál Tibar.

Abitante hamutuk 610 kompostu feto 213 no mane 345 maka hela ona iha kuarentena 17 iha Dili hafoin governu hasai desizaun ida hodi implementa kuarentena obrigatóriu durante loron 14 bainhira fila hosi rai-li’úr.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here