Vise-Prezidente Parlamentu Nasionál, Maria Angelina Sarmento. Foto Egas Cristóvão

DILI, 31 marsu 2020 (TATOLI)—Komisaun C (Finansa Públika), asina ona relatóriu no pareser ba pedidu levantamentu millaun $250 hodi finánsia mákina estadu hahú hosi fulan-abríl ba-oin.

“Ohin komisaun C halo ona aprovasaun ba relatóriu no pareser ba pedidu levantamentu hosi fundu petrolíferu ho montante millaun $250 atu halo reforsu ba kofre estadu ne’ebé provavelmente to’o iha fins de abríl, maiu no juñu ba-oin,” Vise-Prezidente Parlamentu Nasionál, Deputada Maria Angelina Sarmento Lopez, informa ba jornalista sira iha Parlamentu Nasionál, tersa ne’e.

Membru Komisaun C ne’e subliña, pedidu atu halo levantamentu ba fundu petrolíferu ne’e ho karáter urjénsia, ho totál millaun $250 ne’e nia objetivu mak atu halo reforsu ba kofre estadu ba fulan-abríl ba-oin hodi finánsia mákina estadu liuhosi orsamentu duodésimu.

Nia dehan, pedidu levantamentu ho montante  tanba Timor-Leste seidauk iha Orsamentu Jerál Estadu (OJE).

Vise-Prezidente Komisaun C ne’e hateten, orsamentu millaun $250 ne’e seidauk prevé ba nesesidade sira hanesan kombate no prevene COVID-19, inundasaun no estadu emerjénsia, tanba montante ne’ebé Governu sei gasta iha fulan hirak tuir-mai ne’e, sei bazeia de’it ba rejime duodesimál artigu 31 hosi Lei Orsamentu no Jestaun Finanseira (LOGF-sigla portugés).

“Katak, kuandu orsamentu jerál ida seidauk iha, uza osan duodésimu ne’e bazeia ba montante hosi orsamentu tinan anteriór nian mak fahe ba fulan 12,” membru Komisaun Finansa Públika ne’e esplika.

Notísia Relevante: Komisaun C Seidauk Konklui Relatóriu no Pareser Ba Pedidu Levantamentu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here